«О́zenderdiń ashylýy jáne sý deńgeıiniń kóterilýi baıqalady. Bul rette shekti deńgeıden asyp ketken joq», deıdi oblystyq TJD TJ aldyn alý basqarmasynyń bastyǵy Alekseı Shtykel.
Oblysta qar mólsheri 33 paıyzǵa deıin azaıdy. Rıdder qalasynda, Katonqaraǵaı, Borodýlıha aýdandarynda qar qalyńdyǵy 50 santımetrden aspaıdy. Altaı aýdanynda ǵana 71 santımetr.
Ertis, Úbi, Kúrshim ózenderindegi muzdyń keptelip qalý qaýpi bar 19 ýchaskelerde profılaktıkalyq jarylys jumystary júrgizildi. Sondaı-aq, qutqarýshylar oblys aýmaǵynda joǵary daıyndyq rejımde jumys istep jatyr. Jedel shtabtar da qurylǵan.
Al Ertistiń jaǵasyndaǵy Glýbokoe aýdanynda qarsýyn burý jumystary qolǵa alyndy. Jol boıyna 350-den astam qap tóseldi. О́ıtkeni, Glýbokoe kentindegi bulaq arnasyndaǵy sý jolǵa jaıylyp ketken. Oqıǵa ornynda eki tehnıka jáne 24 adam jumys istedi.
