Nık Fıldıngtiń tikeleı redaktorlyǵymen aǵylshyn tilinde jaryq kórgen birinshi kitap «Shoqan Ýálıhanovtyń tańdamaly eńbekteri: Uly dala etnografy jáne tarıhshysy» dep atalady. Qazaqtyń kórnekti ǵalymynyń shyǵarmalary tuńǵysh ret aǵylshyn tilinde kitap bolyp jaryq kórgeni jaıly, ıaǵnı, osy eńbek týraly málimet ótken jyldyń sońynda belgili bolǵan edi.
Jeltoqsan aıynda Ulybrıtanııa Koroldiginiń geografııalyq qoǵamynda kitap aǵylshyn tildi qaýymǵa tanystyrylyp, eńbektiń qundylyǵy týraly oılar aıtylǵan bolatyn. Shoqan Ýálıhanovtyń esseleri tuńǵysh ret 1865 jyly aǵylshyn tiline aýdarylypty. Túgeldeı emes, bar-joǵy tórt esse. Mine, sodan beri aǵylshyn tiline aýdarylyp otyrǵany osy. Bul joly brıtandyq aýdarmashy Arch Teıt jıyrma esseni tárjimalaǵan. Zoom platformasynda ótken onlaın tanystyrylymda «Shoqan Ýálıhanovtyń tańdamaly eńbekteri: Uly dala etnografy jáne tarıhshysy» kitabynyń redaktory Nık Fıldıng kitaptyń Sh.Ýálıhanov atyndaǵy Tarıh jáne etnografııa ınstıtýtymen yntymaqtastyqta Kembrıdj ýnıversıtetiniń baspasynan jaryq kórgenin aıtty.
Instıtýttyń dırektory Zııabek Qabyldınov bastaǵan ǵalymdar Shoqan Ýálıhanovtiń Ortalyq Azııanyń geografııasy, tarıhy, etnografııasy jáne ekonomıkasyna arnalǵan asa mańyzdy ǵylymı eńbekterin aǵylshyn áriptesterine usynǵan. О́z kezeginde bul ǵylymı eńbekterdiń aǵylshyn ǵalymdary tarapynan joǵary baǵalanǵanyn elshiliktiń ókili Áıgerim Seısembaeva atap ótti. Onyń aıtýynsha, kórnekti ǵalymnyń shyǵarmalary Kembrıdj ýnıversıtetiniń Ortalyq Azııany zertteý boıynsha bakalavrıat baǵdarlamasyna engizilmek.
Nık Fıldıngtiń ekinshi kitaby «Uly daladaǵy saıahatshylar» dep atalady. Bul kitapta HIII ǵasyrdan bastap HH ǵasyrǵa deıingi aralyqta Uly dalaǵa saıahat jasaǵan zertteýshiler týraly aıtylady. Kitapta belgili, belgisiz sebeptermen attary umytylǵan saıahatshylarǵa basymdyq berilgen. Olardyń saıahat barysynda kórgen qıyndyqtary, jetistikteri men sátsizdikteri sıpattalǵan jazbalary nazarǵa alynyp, olardyń eń qyzyqtary osy kitapqa toptastyrylǵan. Onlaın júzdesýde brıtandyq jýrnalıst ári jazýshy qos kitaptyń da aǵylshyn tildi oqyrmanǵa Ortalyq Azııa halyqtarynyń erekshelikterin tanytýǵa septigi mol bolatynyn jetkizdi.
