Qostanaı oblysy bilim basqarmasynyń málimetinshe, Arqalyq qalasynda erekshe bilim berý qajettilikteri bar 560-tan astam bala turady, onyń ishinde 118 bala múgedek. Sonymen qatar búgingi tańda erekshe bala mamandardyń tegin kómegin ala alatyn arnaıy uıymdardyń jelisi jetkiliksiz. Arqalyq qalasynyń ózinde 376 bala arnaıy mamandardyń kásibı kómegine muqtaj.
Mamandardyń ýaqtyly jáne bilikti keńesteri men kómegi ómirdi jaqsy jaqqa ózgerte alady jáne kez-kelgen balanyń, ásirese múmkindigi shekteýli balanyń laıyqty jáne tabysty bolashaǵyna múmkindik beredi.
«Jańa PPTK emdik dene shynyqtyrýmen aınalysýǵa arnalǵan keshender, Montessorı bólmesi, dıdaktıkalyq jáne kórneki materıaldar, damytýshy jáne ádistemelik ádebıetter, sondaı-aq balanyń damýyna keshendi baǵalaý júrgizýge jáne ótkiziletin sabaqtardyń tıimdiligine monıtorıng júrgizýge múmkindik beretin baǵdarlamalyq qamtamasyz etý syndy qajetti zamanaýı jabdyqtarmen qamtamasyz etilgen», dedi «Dara» qorynyń ókili Sáýle Beksultanova.
Ortalyqta defektolog, psıholog, logoped, tıflopedagog, EDSh nusqaýshysy, áleýmettik pedagog sııaqty mamandar jumys isteıdi.
«Psıhologııalyq-pedagogıkalyq túzetý kabınetiniń qyzmeti tegin kórsetiledi. Túzetý kómegi kýrsy 3 aıdan bir jylǵa deıin sozylady, qajet bolǵan jaǵdaıda kýrsty uzartýǵa bolady. Mundaı kabınet jylyna erekshe bilim berý qajettilikteri bar 150 balaǵa qyzmet kórsete alady. Mundaı ortalyqtardyń erekshe bala ósip kele jatqan otbasylar úshin qoljetimdi bolýy óte mańyzdy. Sondyqtan «Samuryq-Qazyna» AQ kompanııalar tobynyń qoldaýymen olar tek oblys ortalyqtarynda ǵana emes, shaǵyn eldi mekenderde de ashylýda», dep «Qazpochta» AQ ókili - Arqalyq qalasy poshta baılanysy torabynyń bastyǵy Ulan Janzaqov atap ótti.
Sonymen qatar dál osy kúni A. Qunanbaev atyndaǵy mektep-gımnazııasy bazasynda Inklıýzıvti bilim berýdiń resýrstyq ortalyǵy da ashyldy. Inklıýzıvti bilim berýdiń resýrstyq ortalyǵy - bul oqý prosesinde ınklıýzııa qaǵıdattaryn iske asyrýda muǵalimderge kómek kórsetý jáne erekshe bilim berý qajettilikteri bar balalarǵa synypta jáne mektepte kedergisiz orta qalyptastyrý úshin qurylǵan mektep keńistiginiń bir bóligi.
Aıta keteıik, «Dara» qory 2016 jyldan bastap Qostanaı oblysynda «Ár alýan – biraq teń: Qazaqstanda ınklıýzıvti qoǵam qurý» jobasyn júzege asyrýda jáne osy ýaqyt aralyǵynda Qostanaı qalasynda jalpy bilim beretin mektep bazasynda ashylǵan psıhologııalyq-pedagogıkalyq túzetý kabıneti men kózi kórmeıtin jáne nashar kóretin balalarǵa arnalǵan synyp ashylyp, qazirgi tańda tabysty jumys isteýde.
«Samruk-Kazyna Trust» qorynyń qoldaýymen búkil Qazaqstan boıynsha jalpy sany 15 túzetý kabıneti jáne 16 resýrstyq ortalyq ashyldy.
