Búgin, 12 sáýirde, «Rýhanı jańǵyrý» baǵdarlamasyna 4 jyl toldy. Baǵdarlama iske qosylǵan sátten bastap 123 myń is-shara ótkizildi.
Aqparat jáne qoǵamdyq damý mınıstrliginiń málimetinshe, qazirgi tańda baǵdarlamanyń alty baǵyty boıynsha 17 arnaıy joba iske asyrylýda, óńirlik jobalyq keńselerdiń jumysy jandandyryldy, taldamalyq jáne ádistemelik súıemeldeýdi qamtamasyz etetin Qazaqstandyq qoǵamdyq damý ınstıtýtynyń qyzmeti jolǵa qoıyldy.
Baǵdarlamanyń 3 negizgi qundylyq baǵyty bekitildi: «Tulǵalyq damý», «Ulttyq biregeılik jáne halyqaralyq mártebeni arttyrý», «Memleketti, azamattyq qoǵamdy jáne jergilikti qoǵamdastyqty damytý».
Baǵdarlamany iske asyrýdyń 4 jyly ishinde demeýshilik qarajat esebinen 7000 áleýmettik nysan salyndy. Osy baǵytta óńirlik ınfraqurylymdyq obektilerdi damytýǵa 13 myńnan astam mesenattar qatysty. 4 jyl ishinde eldegi qaıyrymdylyq mádenıeti baǵdarlama aıasynda jańa serpin aldy.
«Qazaqstannyń sakraldy geografııasy» jobasy aıasynda jalpyulttyq mańyzy bar tanymal oryndar men nysandar tizimi keńeıtildi.
Qazaqstannyń kıeli nysandaryn búkil álemge tanytý maqsatynda BBC World News telearnasynyń qatysýymen «Qazaqstannyń kıeli jerleriniń geografııasy», «Altyn adam», «Qoja Ahmet Iаssaýı, Aısha Bıbi keseneleri fılmderi», «Kúltegin. Jańa kózqaras» fılmderi túsirildi. Fılmder álemniń alty tiline aýdarylyp, 700 mln. astam kórermeni «BBC World News», «Discovery», «Viasat history», «National Geographic» telearnalarynda kórsetildi.
Sonymen qatar, «100 jańa oqýlyq» jobasy boıynsha kitaptar memlekettik tilge aýdarylyp, elimizdiń 132 joǵary oqý orny bilim berý prosesine engizildi.
Barlyq aýdarylǵan oqýlyqtar jobanyń www.100kitap.kz resmı saıtynda elektrondy formatta jarııalandy. Aýdarylǵan 100 oqýlyq aıasynda búginde 88 myńnan astam qoldanýshy tirkelgen www.OpenU qazaq jáne orys tilderinde beıne kýrstar ornalastyryldy.
Sondaı-aq, halyqaralyq qoǵamdastyqpen baılanysty nyǵaıtý maqsatynda Qytaı, AQSh, Túrkııa, Reseı, Fınlıandııa, Koreıa, Malaızııa, Vengrııa, Shvesııa jáne basqa da elderdiń ulttyq kitaphanalarynda 34 qazaqstandyq ádebıet jáne mádenıet ortalyǵy ashyldy.
Uly aqyn Abaı Qunanbaıulynyń 175 jyldyq mereıtoıy jáne Ábý Nasyr Ál-Farabıdiń 1150 jyldyǵy aıasynda birqatar shet elderde elimizdiń tarıhı-mádenı murasyn álemde ilgeriletýge zor úles qosyp kele jatqan Qazaqstannyń mádenı ortalyqtary ashyldy.
Álemde oryn alǵan ózgeristerdi eskere otyryp, Baǵdarlamaǵa birqatar jańa arnaıy jobalar engizildi: «Únem – qoǵam qýaty» – pragmatıkalyq ómir saltyn engizý, «Dástúr men ǵuryp» – umyt bolǵan, biraq qazirgi ýaqytta ózekti dástúrlerdi jańǵyrtý, «Quqyqtyq mádenıet» – halyqtyń quqyqtyq saýattylyǵyn arttyrý, «Eńbek - eldiń muraty» – ónimdi eńbekti yntalandyrý, óskeleń urpaq arasynda eńbekke degen súıispenshilikti nasıhattaý.
2021 jyldan bastap «Rýhanı jańǵyrý» baǵdarlamasy Qoǵamdyq sananyń ulttyq jańǵyrtý kezeńine ótý boıynsha jol kartasy formatyna kóshti. Jol kartasynyń is-sharalary men jobalary halyqtyń jas erekshelikterine sáıkes jasaldy jáne 3 negizgi qundylyq baǵyty boıynsha, sondaı-aq baǵdarlamany ǵylymı-ádistemelik, saraptamalyq jáne aqparattyq súıemeldeý boıynsha bólimderge toptastyryldy.
Sondaı-aq, «Rýhanı jańǵyrý» baǵdarlamasyn iske asyrýdyń tıimdiligi» taqyrybyna júrgizilgen áleýmettik zertteýdiń qorytyndylary boıynsha baǵdarlamanyń alty negizgi baǵyty boıynsha qoǵamda ornyqty kózqarastar qalyptasqany baıqalady.
Básekege qabilettilikti sıfrlyq saýattylyqty jáne shet tilderin meńgerý qajettiligimen baılanystyrady (53,6%), pragmatızmdi óz qarajatymen ómir súrý jáne óz bolashaǵyn josparlaý qabiletimen (73,2%), bilimniń saltanat qurýyn oqýda jáne joǵary bilimdegi eńbekqorlyqpen (58,3%), ulttyq biregeılikti saqtaýdy tarıhty qurmetteýmen jáne birtutas ultqa jatý sezimimen (71,4%), evolıýsııalyq damýdy zań men azamattyq paryzdy saqtaýmen (77,8%), al sananyń ashyqtyǵyn ózgeristerge daıyndyqpen jáne únemi ózin-ózi jetildirýmen (59,5%) baılanystyrady.
