Shyǵarmashylyq shańyraǵynda qolǵa alynǵan kórmege óz kezegimen jyl kóleminde oblystyń on bes aýdany qatysady. Sýretshilerimen qatar aqyndary, ánshileri de óner kórsetedi. Tolaǵaı taýynyń bókterinen kelgen kókpektilikter «Dala dıdary» atty kórmege baryn saldy. Belgili aıtysker aqyn Farhat Maratuly jyrdan shashý shashsa, «Tolaǵaı» sazdy halyq aspaptar orkestriniń áni áýeledi.
Al mýzeıdiń keń zalyna Kókpektiniń kórikti tabıǵaty beınelengen kartınalar men qolóner sheberleriniń jasaǵan buıymdary qoıyldy. Ásirese, Serikbaı Rysúmbetovtiń «Qys», Elmıra Izǵuttynovanyń «Tań» atty peızajdary kópshiliktiń nazaryn aýdardy. Oksana Lýskaıa, Janna Jabekovalardyń jasaǵan qolóner buıymdaryna da kelgen qonaqtar qyzyǵa qarady. Kópshilik deımiz, sanıtarlyq talaptarǵa saı shaqyrylǵan qonaqtardyń sany shekteýli edi. Kórmeni kelip kóre almaǵandar úshin mýzeı qyzmetkerleri áleýmettik jeli arqyly onlaın ekskýrsııa uıymdastyrady.
– Oblys ortalyǵynda aýdandardyń kórmesin ótkizý – óte durys úrdis. О́ıtkeni óz aýylynan uzamaı júrgen ónerli jastar kóp. «Almas pyshaq qyn túbinde jatpaıdy» demekshi, boıynda talanty bar qyz-jigitter rýhanı ortaǵa kórinýi kerek. Men kórmelerge daryndy jastardy izdep kelemin. Talaby bolsa, kórgen-bilgenimdi aıtamyn, úıretemin, – deıdi belgili sýretshi Qudash Nursadyqov.
Ras, alys aýyldaǵy shyn talanttardyń óneri órge júzsin desek, osyndaı dúbirli kórmeler jıi ótkizilip turýy kerek. Kókpektiden keıin Shyǵys jurty mamyr aıynda Kúrshim, Altaı aýdandarynyń kórmesin tamashalaıdy.
Shyǵys Qazaqstan oblysy
