Barlyq qarsylasyn qapy qaldyryp, aqtyq synǵa deıin alqynbaı jetken Sultan Ásetuly men Álimhan Syzdyqov bas júlde úshin talasty. 63 kılo salmaqtaǵy Ásetuly osyǵan deıin taıpeılik Chjý Chı Hýan jáne sırııalyq Muhammed Fýazdytyrp etkizbeı jeńgen bolatyn. Fınalda ol ırandyq Meısam Dalhanımen kúsh synasty. Tarazy basy uzaq ýaqyt boıy teńselip turǵan básekeniń taǵdyry ekinshi kezeńiniń bel ortasynda sheshildi. Qarsylasyn jambasqa salǵan Sultan aıqyn jeńiske qol jetkizip, Azııa chempıony atandy.
130 kılo salmaqtaǵy Álimhan Syzdyqov bastapqy básekelerde japonııalyq Sota Nakamýra men Mınjon Kımdi qapy qaldyrdy. Aqtyq synda qazaqtyń nar tulǵaly balýany Irannyń alyby Álıaqpar Iýsýpahmadchalımen aıqasty. Bul tartysta Parsy eli ókiliniń mereıi ústem boldy. Álimhan kúmis medaldi moınyna ildi.
Al 77 kılo salmaqtaǵy Demeý Jadyraev pen 87 kılo salmaqtaǵy Nursultan Tursynov qola medal úshin saıysqa tústi. Demeý túrkimenstandyq Muhammedberdi Mamedovty utsa, Nursultan ózbekstandyq Rýslan Assaqalovpen teń tústi. Al kúrestiń erejesi boıynsha sońǵy ádisti kim jasasa,jeńis sonyń enshisine jazylady. Bul rette Assaqalovtyń asyǵy alshysynan túsip, Tursynov jeńis tuǵyryna kóterile almady.
