«Mundaı jobany mınıstrliktiń ázirlegeni ras jáne qazir talqylaý prosedýrasynan ótýde. Iаǵnı joba qabyldanǵan joq. Ázirge keńinen talqylaý úshin ǵana usynyldy», delingen vedomstvo taratqan aqparatta.
Bul joba bıyl 11 naýryzda Úkimet otyrysynda maquldanyp, áleýmettik mańyzy bar azyq-túlik taýarlarynyń baǵasyn turaqtandyrý jónindegi Jol kartasyn iske asyrý maqsatynda ázirlenipti.
«Astyq tapshylyǵy týraly másele joq. Joǵaryda aıtylǵandaı, 2020 jylǵy ónim eldi astyqpen tolyq qamtamasyz etýge jáne belgili bir bóligin eksportqa shyǵarýǵa da jetedi.
Taǵy bir másele – astyq baǵasy. Dástúrli túrde astyqtyń ishki naryqtaǵy quny eksporttyq baǵalarǵa baılanysty qalyptasady. Qazir eksporttyq naryqtarda astyqqa degen suranys artyp otyr. Buqaralyq aqparat quraldary bul jóninde durys jazǵan», dedi vedomstvo ókilderi.
Bıylǵy astyqty jınaý naýqanyna deıin áli bes aı baryn eskersek, qazir ishki naryqtaǵy astyqtyń baǵasy turaqty. Dese de mamandar aldaǵy ýaqytta syrtqy jáne ishki naryqta baǵanyń ósetinin joqqa shyǵarmaıdy.
«Qazaqstan osyndaı jaǵdaılarǵa daıyn bolýy kerek jáne «áleýmettik nan» baǵasyn turaqtandyrý sharalaryn osy bastan qolǵa alýy tıis. Un baǵasy kóterilgen jaǵdaıda naýbaıhanalarǵa áleýmettik mańyzy bar ónimderdiń baǵasyn ustap turý qıyn bolatynyn túsiný kerek. Ol úshin tasymaldaý shyǵyndaryn óteý sekildi sharalar qajet.
Bul jerde astyq ósiretin oblystardan shalǵaı óńirler jaıly sóz bolyp otyr. Mysaly, Almaty, Jambyl jáne Túrkistan oblystarynda bıdaı ósirilgenmen, onyń uny nan pisirýge kele bermeıdi. Sondyqtan osy óńirlerdegi jeke óndirister halyqtyń nanǵa degen qajettiligin qamtamasyz ete almaıdy», dep habarlady mınıstrlik.
Sondaı-aq Aýyl sharýashylyǵy mınıstrligi normatıvtik quqyqtyq aktilerdi kelisý jáne qabyldaý prosedýralaryna edáýir ýaqyt ketetinin, tek «Ashyq normatıvtik quqyqtyq akt» portalynda talqylaý kem degende 11 kúntizbelik kún ishinde ótkizilýi tıis ekenin jetkizdi.
