Tarıhı jeńiske qol jetkizdi

Matchtan bir kún buryn ótken jerebe tartý rásiminde jarystyń birinshi kúninde kortqa eń alǵash Iýlııa Pýtınseva men jarys qo­jaıyny, túbi ýkraınalyq Nadıa Podoroska shyǵatyny belgili bol­dy. О́tken jyly Rolan Gar­ros týrnırinde aıdy aspanǵa shy­ǵaryp, jartylaı fınalǵa deıin jetken N.Podoroska Argen­tınanyń birinshi raketkasy sanalady. Sol aıtýly dodada ol jerlesimiz Iý.Pýtınsevany da jeńip ketkeni jankúıerlerdiń esinde bolsa kerek. Ekinshi match Qazaqstannyń 1-shi, álemniń 23-raketkasy Elena Rybakına men Argentınanyń ekinshi raketkasy Marııa Lýrdes Karle arasynda ótetin bolyp bekitildi. Al ekinshi jarys kúninde N.Podoroska men E.Rybakına, M.Karle men Iý.Pý­tınseva jáne juptyq synda Iаros­­lava Shvedova men Anna Da­­nılına – N.Podoroska men M.Kar­le kezdesýleri josparlan­dy.

Jarystyń shymyldyǵyn ash­qan Iýlııa Pýtınseva men Na­dıa Podoroska jankúıerlerge naǵyz tartysty oıyn syılady. Match aldynda-aq jerlesimizdiń byltyrǵy Rolan Garrosta ketken esesin qaıtarýdy kózdeıtini, Podoroskany óz elinde jáne jan­kúıerleri aldyna qalaıda jeńip ketkisi keletini aıdan anyq edi. Matchtyń birinshi partııasy 6:2 esebimen argentınalyq tennısshiniń paıdasyna sheshildi. Ekinshi partııada qarsylasyna qara­ǵanda saýatty oınaǵan qa­zaq­standyq tennısshi jyldam ese qaıtaryp úlgerdi – 6:4. Sheshýshi úshinshi sette Iý.Pý­tınseva reıtıngte bekerge 30-orynda turmaǵanyn dá­lel­dep, qarsylasyna birde-bir geım bermeı 6:0 nátıjesimen qapy qaldyrdy. Osylaısha N.Po­do­roskaǵa Parıjde ketken esesin qaıtarǵan Iýlııa birinshi oıynnan keıin Qazaqstan quramasyn esepte alǵa shyǵardy – 1:0.

Kortqa ekinshi bolyp shyqqan Elena Rybakına dúnıejúzilik reıtıngte nebári 430-orynda turǵan argentınalyq Marııa Lýrdes Kar­leni qalpaqpen uryp alady dep oılap, match bastalmaı jatyp-aq Rybakınanyń jeńisine senimdi bolǵanbyz. О́kinishke qaraı, oıyn biz kútkendeı órbigen joq. Birinshi partııada E.Rybakına eki breıkpen alǵa shyqqanymen, qarsylasy tez arada tarazy basyn teńestirip qana qoımaı, 6:4 nátıjesimen jeńiske jetti. Ekinshi sette Elena taktıkasyna ózgeris engizip, óz múmkindigin tıimdi paıdalanyp, 6:3 esebimen tablodaǵy kór­­setkishti – 1:1-ge jetkizdi. Úshin­shi partııada ózin jaısyz sezin­gen Rybakına medısınalyq kómekke de júginýge májbúr boldy. Básekeni oıyndaǵydaı ótkize almaǵan jerlesimiz birde-bir geımde basymdyq tanyta almaı, qarsylasyna 6:0 esebimen jol berdi. Sóıtip birinshi jarys kúninen keıin esep teńesti – 1:1.

Ekinshi jarys kúnindegi tań­ǵy sessııada kortqa shyqqan Elena Rybakına bir kún buryn Iý.Pýtınsevadan jeńilgen Nadıa Podoroskamen kezdesti. Keshegi je­ńilisinen tıisti qorytyndy shyǵara bilgen elimizdiń birin­shi raketkasy qarsylasyn esh qıyndyqsyz eki sette 6:4, 6:4 ese­bimen jeńip, Qazaqstan quramasy taǵy da alǵa shyǵardy. Esep – 2:1.

Túski sessııadaǵy Iýlııa Pý­tın­seva men Marııa Lýrdes Kar­le arasyndaǵy match Qazaq­stan quramasy úshin jarysty merziminen buryn jeńispen aıaq­taýǵa, al Argentına tennıs­shi­lerine esepti teńestirip, kez­desýdi juptyq básekege deıin sozýǵa tamasha múmkindik edi. Alaıda alǵashqy setti óz paıdasyna sheshken (7:6) Iýlııa ekinshi settiń so­ńynda oqys qımyldap, baltyryn aýyrtyp aldy. Qazaqstan quramasynyń dárigerleri tez arada otandasymyzǵa medısınalyq kómek kórsetti. Aıaǵy aýyrǵanyna qaramastan oıyndy jalǵastyrǵan Pýtınseva bul sette 7:6 esebimen qarsylasyna jol berdi. Úziliste taǵy da medısınalyq kómekke júgingen jerlesimiz úshinshi setke shyqqanymen, jarysty ári qaraı jalǵastyra almady. Osylaısha tórt oıynnan keıin esep teńesip (2:2), barlyǵy juptyq básekede sheshildi.

 Jalpy esep teńesken soń Ar­gentına tennısshileriniń qýa­nyshynda shek bolmady. Quddy Qazaqstan quramasyn jeńip, kelesi kezeńge shyqqandaı áser qaldyrdy. Biraq juptyq synda Argentına quramasynan eki kúnde eki oıyn ótkizip, áli qu­ryp qalǵan Nadıa men Marııany bizdiń quramanyń tyń oıynshy­lary – Anna Danılına jáne Iаroslava Shvedova kútip turǵan edi. Eki setke sozylǵan básekeniń birinshi setinde jerlesterimiz qarsylastaryna soqyr upaı ustatpaı 6:0 esebimen basym tústi. Biraq ekinshi sette qarsylastar bizdiń quramanyń tennısshilerine biraz qarsylyq kórsetti. Jer­gilikti jankúıerlerdiń qoldaýyna ıe bolǵan kort qojaıyndary esepti 5:5-ke jetkizgenimen, qalǵan eki geımde jeńisti julyp alýǵa shamalary kelmedi. Qorytyndy esep – 7:5.

Jalpy esepte 3:2 esebimen basym túsken Qazaqstan qura­ma­synyń tennısshileri alǵash ret pleı-off kezeńinde jeńiske jetip, tarıhı jetistikke qol jetkizdi. Osylaısha, bizdiń qurama álemdik toptaǵy óz ornyn saqtap qana qoımaı, 2022 jyly ótetin týrnırdiń fınaldyq básekesinde oınaý quqyǵyna ıe boldy.