Kúni keshege deıin sary qurlyqtyń basty dodasynda Qazaqstannyń aýyr atletteri tabysty óner kórsetip, únemi úzdikter qatarynan kórinip júrdi. Alaıda sońǵy jyldary dopıng daýyna baılanysty Azııa chempıonatynda oljalaǵan júldelerimizdiń sany kúrt kemidi. Endi birte-birte jaǵdaı ońalyp keledi. Joǵarydaǵy olqylyqtyń ornyn toltyrý úshin Tashkenttegi tartysta tolaǵaılarymyz bar kúsh-jigerin jumsaıdy dep úmittenemiz. Osy sózimiz dáleldi bolý úshin sońǵy bes Azııa chempıonatynyń nátıjelerine kóz júgirteıik.
2013 jylǵy sary qurlyqtyń basty dodasyn Astana qalasy qabyldady. О́z jerimizde ótken jarysta jerlesterimiz jergilikti jankúıerlerdi qýantý úshin baryn saldy. Erler saıysynda 94 kılo salmaqta synǵa túsken Aleksandr Zaıchıkovtiń asqan sheberligine tánti boldyq. Qossaıystyń qorytyndysy boıynsha 385 (175+210) kılo salmaqta eńsergen Syr boıynyń saıypqyrany jeńis túǵyrynyń eń bıik satysyna kóterildi. Áıelder arasynda Anna Nurmuhambetova (75 kılo) men Aleksandra Abornevaǵa (+75 kılo) teń keler eshkim tabylmady. Farhad Harkı (62 kılo) kúmis alsa, Evgenıı Estafev (85 kılo) pen Ibragım Bersanov (+105 kılo) qolaǵa qol sozdy. Qorytyndy esepte otandastarymyz (3 altyn+1 kúmis+2 qola) úshinshi oryndy enshilese, birinshi oryndy Soltústik Koreıanyń (4+3+2 qola), ekinshi oryndy Irannyń (4+1+2) ziltemirshileri jeńip aldy.
2015 jyly Taılandtyń Phýket qalasynda ótken jarysta Aıdar Qazov (77 kılo), Ermek О́mirtaı (85 kılo) jáne Rústem Sybaı (94 kılo) bas júldeni oljalasa, Ásem Sadyqova (58 kılo), Faına Sybanbaeva (63 kılo) jáne Maıra Faızolaeva (69 kılo) qola medaldi moıyndaryna ildi. Osy nátıjemen jerlesterimiz jalpy esepte ekinshi oryndy ıelendi. Aldymyzda tek Qytaı quramasy. Aspanasty eliniń ókilderi 6 altyn, 3 kúmis jáne 1 qolany qorjynǵa saldy.
2016 jyly Tashkentte ótken jarysqa Qazaqstannan qosalqy quramdaǵy ziltemirshiler attandy. О́ıtkeni beldi sportshylarymyz Rıo Olımpıadasyna daıarlanyp jatty. Bapkerler olardyń esh alańsyz jattyǵýyna kedergi jasamaýdy qup kórdi. О́zbekstannyń bas shaharynda otandastarymyzǵa bir altyn ǵana buıyrdy. Onyń ıegeri – 85 kılo salmaq dárejesinde synǵa túsken Denıs Ýlanov. Nátıjesinde, Japonııa, Mońǵolııa jáne Qyrǵyzstanmen birge 6-9 oryndardy ózara bólistik.
2017 jyly dopıng daýynyń órshýine baılanysty Túrikmenstannyń astanasy – Ashǵabadqa úsh ziltemirshi ǵana attandy. Solardyń arasynan 69 kılo salmaqtaǵy Albert Lınder sýyrylyp shyǵyp, altyn medaldi oljalady. Jalpy esepte bizdiń komanda jetinshi orynǵa taban tiredi. 2018 jylǵy jaǵdaı da dál solaı boldy. Sanaýly ǵana sportshyǵa senim artqan Qazaqstan quramasy Qytaıdyń Nınbo qalasynan úsh qolamen oraldy. Bul júldelerdiń ıegerleri – Arlı Chonteı (55 kılo), Denıs Ýlanov (81 kılo) jáne Raýshan Meshithanova (81 kılo). Komandalyq esepte 14-oryndy qanaǵat tuttyq.
Tashkentte shymyldyǵy túrilgen Azııa chempıonatynda basty úmit álemniń úsh dúrkin chempıony, Azııa oıyndarynyń eki dúrkin kúmis júldegeri Zúlfııa Chınshanlo (55 kılo), álem chempıonatynyń kúmis júldegerleri Arlı Chonteı (55 kılo) men Igor Son (61 kılo), osyǵan deıin de Azııa birinshiliginde úzdikter sanatynan kóringen Raýshan Meshithanova (87 kılo) men Ibragım Bersanov (109 kılo) syndy saqa sportshylarǵa senim artylýda. Odan bólek, jastaıynan jasyndaı jarqyldap, óz qatarlastary arasynda qarsylas shydatpaı júrgen 17 jastaǵy Rahat Bekbolat (102 kılo) ta qalyń toptyń arasynda qalyp qoımaıdy dep úmittenemiz.
Al Azııa chempıonatynda Qazaqstannyń namysyn qorǵaıtyn aýyr atletterdiń tolyq tizimi mynadaı:
Erler: 55 kılo – Abylaı Áýelhanov pen Arlı Chonteı, 61 kılo – Igor Son men Alekseı Drozdov, 67 kılo – Saıramkez Aqmolda, 81 kılo – Aleksandr Ývarov, 89 kılo – Nurǵısa Ádiletuly, 102 kılo – Artem Antropov pen Rahat Bekbolat jáne 109 kılo – Ibragım Bersanov.
Áıelder: 55 kılo – Zýlfııa Chınshanlo, 64 kılo – Gúlnur Ybyraı, 71 kılo – Ekaterına Bykova men Aısha Omarova, 81 kılo – Karına Quzǵanbaeva, 87 kılo – Raýshan Meshithanova jáne +87 kılo – Aızada Múptilda.
