«Jaqsylyqqa sený úshin áýeli óziń jaqsylyq jasaı bilýiń kerek» deıtin ráýishti, mazmundy sóz bar. El Prezıdentiniń baǵaly usynysynan bastaý alǵan oń sharýalar keńinen qanat jaıyp, janashyrlyq shýaǵyn shasha bastady. Uly istiń ulaǵatynan Býrabaı baýraıyn jaılaǵan jalpaq jurt ta shet qalǵan joq. El qamyn jegen eriktiler áleýmettik jaǵynan az qamtylǵan toptardy, kúni kisige qarap qalǵan qarttardy, múmkindigi shekteýli jandardy elep-jebep, dert barynsha beleń alyp, kúshine minip turǵan tusta qamqorlyq kórsetý sharalaryn tyńǵylyqty júzege asyrdy. Sol kezde qorǵanys quraldarynyń qasqaldaqtyń qanyndaı taptyrmaı ketkeni málim. Talmaý tusty tap basqan eriktiler aldymen halyqtyń esine salyp, jaman tumaýdyń sheńgelinen qalaı aman qalýdy uǵyndyratyn eskertpeler jazylǵan paraqshalar taratty. Medısınalyq qorǵanys quraldarymen de molynan qamtamasyz etti. Aýdandaǵy qaýqarly, iri kásiporyn basshylarymen kelissózder júrgize otyryp, aýyrtpalyqty eńserý olar úshin de paryz ekendigin jetkizip, qaıyrymdylyq jasaýǵa baǵyttady. Jınalǵan qarajattyń biraz bóligi azyq-túlik sebetterin daıyndaýǵa jumsaldy. Jaman tumaýdan jasqanyp qarǵa adym jer attap shyǵa almaı otyrǵan qarttarǵa birsydyrǵy qamqorlyq jasalyp, tórt qubylasyn teńestirdi.
Eriktiler «Biz birgemiz», «Biz bolmasaq, kim?», «Qaıyrymdy kórshiler» tárizdi áleýmettik aksııalar uıymdastyrdy. Karantın kezinde 600-den astam otbasyǵa jalpy kólemi 9 mln teńgege taıaý kómek kórsetildi. Jalǵyzbasty qarttarǵa kún saıyn ystyq tamaq jetkizip, medısınalyq betperdeler tegin taratyldy. Osy oraıda, oblystyq «LIDER.KZ eriktiler qozǵalysy» qoǵamdyq birlestigi aýdanda jaqsylyq sharapaty mol isti uıymdastyryp, damytýǵa belsendi kómek kórsetti. El úshin jasalatyn eren istiń úlgisin kórsetken eriktiler Bulandy, Býrabaı aýdandary men Kókshetaý qalasy arasynda jolaýshylardy tegin tasymaldaýdy uıymdastyrdy. Nur-Sultan qalasynan 30 ınfraqyzyl termometr men 200 hımııalyq qorǵanys kostıýmin, 3600-ge jýyq medısınalyq betperde jetkizip berdi. Oǵan qosa sozylmaly syrqaty bar, emhanada tirkelgen 120 adamǵa qajetti dári-dármekterin tabys etti.
Karantın kezinde dári-dármektiń qymbattap ketkeni de belgili. Qozǵalys músheleri baǵanyń turaqty, qoljetimdi bolýyn udaıy qadaǵalady. Jasandy tapshylyqqa jol bermeý úshin qaladaǵy dárihanalardyń baǵasyna jıi monıtorıng júrgizip otyrdy. Qala mektepterinde sanıtarlyq-epıdemııalyq talaptardyń saqtalýyn da kózden tasa etken joq. Úreı meńdegen osy bir kezde áldebir sebeptermen joǵalyp ketken adamdardy izdestirýge de at salysty.
Volonterlyq jobalardyń shaǵyn granttary baıqaýynyń qorytyndysy boıynsha 300 myń teńgeniń grantyn utyp aldy. Osy jobanyń nátıjesinde tótenshe jaǵdaılar sátinde jedel áreket etetin shtab jumysy jolǵa qoıyldy. Berilgen ótinimderge sáıkes termos, árqıly keýdesheler, dári qobdıshalary tárizdi qajetti zattar satylyp alyndy. Jıyrmaǵa jýyq muqtaj balaǵa «Mektepke jol» qaıyrymdylyq aksııasy sheńberinde kómek kórsetildi.
Býrabaı baýraıyndaǵy berekeli sharýa el ishinde qaıyrymdy jandardyń kóp ekenin, osyndaı qıyn sátte toptasa biletindigin kórsetip berdi.
Aqmola oblysy,
Býrabaı aýdany
