Qasym-Jomart Toqaev Tatarstanmen yntymaqtastyq Reseı Federasııasymen aradaǵy keshendi is-qımyldardyń ishindegi eń mańyzdysy sanalatynyn atap ótti.
Memleket basshysy Tatarstan Prezıdentiniń jaqynda Qaraǵandy oblysyna jasaǵan saparyn joǵary baǵalady. Sol sapar kezinde Saran qalasynda dóńgelek shyǵaratyn zaýyt iske qosylǵan bolatyn.
– Biz bul kásiporynǵa úlken úmit artyp otyrmyz. Qazaqstandyqtardyń úlken bir tobyna Tatarstanda bilim alýǵa múmkindik jasaǵanyńyz úshin rızashylyǵymdy bildiremin. Men muny budan keıin de jalǵasy bolatyn naqty joba dep bilemin. Bizdiń naryqta «Tatneft» kompanııasynan basqa, «KamAZ» kásipornymen birlesken jobalarymyz da bar, – dedi Qazaqstan Prezıdenti.
Qasym-Jomart Toqaev Tatarstanmen mádenı-gýmanıtarlyq baılanystardy odan ári nyǵaıta berýge beıildi ekenin jetkizdi.
– Biz tatar mádenıetin óte jaqsy bilemiz jáne qurmetteımiz. Sizderdiń mádenıetterińiz bizdiń elde keńinen tanymal. Taıaý ýaqytta, pandemııa bitkennen keıin Qazaqstanda Tatarstan mádenıeti men óneriniń kúnderin ótkizýge kelisemiz dep oılaımyn. Biz bul is-sharanyń tabysty ótýi úshin barlyq jaǵdaıdy jasaımyz, – dedi Memleket basshysy.
Qasym-Jomart Toqaev Rýstam Mınnıhanovqa Nur-Sultan qalasynan tatar halqynyń kórnekti ókili, aıtýly aqyn Ǵabdolla Toqaıdyń atyna bir kóshe beriletini jaıynda aıtty. Bul eki halyq arasyndaǵy yntymaqtastyqtyń jarqyn belgisiniń biri bolmaq.
О́z kezeginde Tatarstan Prezıdenti Qazaqstanǵa jasaǵan kezekti saparynyń tabysty ótkenine rızashylyǵyn bildirdi.
– Reseı-Qazaqstan qarym-qatynastary aıasynda Tatarstan kóptegen jobalardy iske asyryp jatyr. Ekijaqty baılanystardyń irgetasy berik. Bizdiń Tuńǵysh Prezıdentimiz Mıntemir Sharıpovıch Shaımıev Sizge duǵaı sálem aıtyp jatyr. Onyń Qazaqstannyń Tuńǵysh Prezıdenti Nursultan Ábishulymen baılanysynyń arqasynda ózara qarym-qatynasymyzdyń negizi myqty qalanǵan, – dedi Rýstam Mınnıhanov.
Áńgimelesý barysynda taraptar Qazaqstan men Tatarstan arasyndaǵy saýda-ekonomıkalyq, ónerkásiptik, energetıkalyq kooperasııalardy odan ári nyǵaıtý, sondaı-aq, koronavırýs pandemııasymen birlesip kúresý máselelerin talqylady.
