Memleket basshysy Q.K.Toqaev ana tili men tól ádebıettiń qadir-qasıetin balalarǵa mektep jasynan sińirý qajettigin aıta kelip: «Osyǵan oraı Almatydaǵy Abaı atyndaǵy mektep-ınternattyń múmkindikterin tolyq paıdalanǵan jón.
Qazaq tili men ádebıetin tereńdete oqytatyn bul mekteptiń oqý úderisi basqa mektepterge úlgi bolady dep oılaımyn. Ony zamanaýı talapqa saı jan-jaqty jetildirip, «Abaı mektebi» dep atalatyn eń úzdik bilim ordasyna aınaldyrý qajet. Jalpy biz keleshekte Abaı mektepterin ashý týraly oılanýymyz kerek», – dep pikir bildirgen edi. Osy tapsyrmaǵa sáıkes respýblıkanyń ár aımaǵynda 3 megapolıs pen 11 oblysta (Aqtóbede jańa ǵımarat salynýda) gýmanıtarlyq baǵyttaǵy Abaı mektepteri jelileri ashylyp, ol mektepterdiń bazalyq ortalyǵy retinde Abaı atyndaǵy RMMI jumys atqarýda. Abaı mektepteri jelisin ashý týraly tapsyrma berilgen sátten resýrstyq ortalyq retinde Abaı RMMI ustazdary men JOO ǵalym-oqytýshylary birlese otyryp, Abaı mektepteri jelisiniń 5-11-synyptaryna arnalǵan jańartylǵan mazmundaǵy tereńdetilgen «Qazaq tili», «Qazaq ádebıeti», «Abaıtaný» pánderiniń baǵdarlamalaryn jáne oqý josparyn ázirlep, 8 ret talqylaýdan ótip, óńdelip, Bilim jáne ǵylym mınıstrligi bekitken bolatyn. Osy baǵdarlama aıasynda bilim alǵan Abaı mektepteriniń shákirtteri ana tilinde sheshen sóılep, dilmarlyq qabiletterin shyńdap, tól ádebıetimizdiń qaınar bulaǵynan tereń sýsyndap, Abaıdyń tulǵalyq bolmysyn keńinen ashýǵa múmkindik almaq. Bul – ultjandy urpaq tárbıeleýge jasalǵan alǵashqy qadam.
2020 jyldyń 23 jeltoqsan kúni Abaı mektepteri jelisine arnalǵan «Bilim berýdegi 4K modeli: teorııa men ádisteme» taqyrybyndaǵy respýblıkalyq ǵylymı-tájirıbelik konferensııa ótkizilip, Abaı mektepteriniń alǵashqy otyrysy, alǵashqy basqosýy boldy. Konferensııanyń plenarlyq otyrysyn ashyp, quttyqtaý sóz sóılegen BǴM Mektepke deıingi jáne orta bilim berý komıteti tóraǵasynyń orynbasary J.Karambaev bul tarıhı kún ekenin aıta kelip, «Abaı mektepteriniń» mıssııasy – ulttyq qundylyqtardy boıyna sińirgen, qazaq tili men ádebıetin tereńdete oqıtyn, fýnksıonaldy saýatty jáne ultjandy jeke tulǵany tárbıeleý», – ekenin atap ótti. Plenarlyq otyrysta «Abaı mektepteriniń» logotıpi, oqý jospary, bir jyldyq jumys jospary, tereńdetilgen baǵdarlamalar tanystyryldy. Konferensııa aıasynda «Abaı mektepteriniń» ustazdary úshin úsh seksııa jumys jasady: 1) «Qazaq tili», «Qazaq ádebıeti», «Abaıtaný» pánderiniń oqytylýy; 2) Gýmanıtarlyq pánderdiń oqytylýy jáne tárbıe jumysy; 3) Beıindik pánderdiń oqytylýy. Bul konferensııa respýblıkadaǵy «Abaı mektepteriniń» arasynda qyzmettik ári shyǵarmashylyq baılanys ornatqan tarıhı kún retinde este qaldy.
Abaı mektepteri arasyndaǵy baılanys ári qaraı da jalǵasyn taýyp, «Abaı mektepteri jelisinde «Qazaq tili», «Qazaq ádebıeti», «Abaıtaný» pánderin oqytý erekshelikteri» jáne «Abaı mektepteri jelisinde beıindik pánderdiń oqytylýy» taqyryptarynda 72 saǵattyq onlaın kýrstar uıymdastyryldy. Kýrs barysynda joǵary oqý oryndarynyń tilshi, ádebıettanýshy, abaıtanýshy ǵalymdary, sonymen qatar pedagogıkalyq sheberlik ortalyǵynyń ádisker ustazdary shaqyrylyp, dárister oqydy. Abaı RMMI ustazdary sheberlik saǵattaryn kórsetip, qatysýshy ustazdarmen keri baılanysqa túsip otyrdy. Tek úıretý, kórsetýmen shektelmeı, ekijaqty baılanysqa qurylǵan bul kýrstar Abaı mektepteriniń muǵalimderi úshin shynaıy tájirıbe alańyna aınaldy.
«Qazirgi jahandaný dáýirinde jańa tehnologııanyń qarqyndy damýy ómirimizge túbegeıli ózgerister ákeldi. Uly Abaı únemi synǵa alǵan masyldyq qoǵamǵa eshqashan jaqsylyq ákelgen emes. Sony túsinetin jastarymyz tek bilimmen qarýlanyp, eńbekke ǵana arqa súıeýi tıis. Biz qazirgi zamannyń jańasha talaptary men úrdisterine árqashan saı bolýymyz kerek», – dep Memleket basshysy Q.K.Toqaev aıtqandaı, qazirgi tańda bilim berýshige de, bilim alýshyǵa da qoıylatyn talap múlde bólek. Sonyń biri – oqýshylardyń tildik saýattylyǵymen qatar, fýnksıonaldyq saýattylyǵyn qalyptastyrý. Osy oraıda, respýblıka ustazdarynyń suranysy boıynsha, Abaı mektepteri jelisiniń jáne respýblıkadaǵy qyzyǵýshylyq tanytqan ózge de bilim ordalarynyń ustazdaryna arnap «Oqýshylardyń oqý saýattylyǵyn qalyptastyrýdyń tıimdi ádis-tásilderi» taqyrybynda vebınar ótkizildi. Bizdiń bilim ordamyz – Abaı atyndaǵy respýblıkalyq mamandandyrylǵan daryndy balalarǵa arnalǵan qazaq tili men ádebıetin tereńdete oqytatyn orta mektep-ınternaty men Abaı atyndaǵy Qazaq ulttyq pedagogıkalyq ýnıversıteti arasyndaǵy birlesken memorandým negizinde atalǵan JOO-nyń Fılologııa jáne kóptildi bilim berý ınstıtýtymen birlese vebınar ótkizildi. Ulttyq biryńǵaı testileýde negizgi pán retinde tapsyrylatyn oqý saýattylyǵyn tıimdi sheshý jáne taldaý boıynsha ustazdarmen tájirıbe bólisý maqsatynda Abaı mektepteri jelisiniń jyldyq josparyna sáıkes sheberlik synyptary kórsetildi.
Aldaǵy ýaqytta da jelilik «Abaı mektepteriniń» ortalyq bazasy retinde jumystar qarqyndy túrde jalǵasyn tabady. Bıylǵy oqý jylynda Abaı mektepteri úshin jasalǵan jyldyq josparǵa sáıkes, sáýir aıynda respýblıka kóleminde III «Dilmar» sheshendik saıysyn, mamyr aıynda «Jańartylǵan bilim berý: jańa kózqaras, naqty qadamdar» taqyrybynda pedagogıkalyq ıdeıalar festıvalin ótkizý josparlanýda.
Bizge qoıylatyn talap – ulttyq sıpatymyzdy joǵaltpaı, alǵa senimdi adymdar jasaıtyn býyn tárbıeleýge tamshydaı bolsyn úles qosý. «Bolashaq – jastardyń qolynda». Sapaly da sanaly urpaq – elimizdiń alǵa basýdaǵy úmiti, dúbirli dodada ozyp shyǵatyn dúldúli.
Roza SEKSENOVA,
Abaı atyndaǵy respýblıkalyq mamandandyrylǵan daryndy balalarǵa arnalǵan qazaq tili men ádebıetin tereńdete oqytatyn orta mektep-ınternat dırektory mindetin atqarýshy
