Osy oraıda Semeı ákimi men «Semavtopark» JShS ókilderi «Semey Bus» JShS qyzmetkerlerimen kezdesti.
– Men bir jarym jyldan keıin burynǵy kompanııa sııaqty jaǵdaıǵa tap bolǵanymyzdy qalamaımyn. Sondyqtan jalaqyny bir kestege sáıkes 300-350 myń teńge aralyǵynda tóleý qarastyrylady. Jumys aýyrlyǵyna qaraı jalaqy qosylýy da múmkin. Kondýktorlarǵa kelsek, biz olarmen de eki aıǵa kelisimshartqa qol qoıamyz. Jalaqy keste boıynsha 150-180 myń teńge aralyǵynda tólenýin qarastyramyz. Barlyǵyn resmı túrde jumysqa ornalastyramyz. Esh alańsyz jalaqy alyp, óz jumystaryńyzdy atqara beresizder, – dedi «Semavtopark» JShS bas dırektory Grıgorıı Pınchýk.
Konkýrs jarııalanǵanǵa deıingi ótpeli kezeńde «Semavtoparktiń» 75 avtobýsy iske qosylady. Park basshylyǵy alǵashqy kúnderi keıbir keleńsiz jaǵdaılar bolýy múmkin ekendigin de joqqa shyǵarmady. О́ıtkeni tehnıkalar uzaq ýaqyt jumyssyz turyp qalǵan. Degenmen avtopark basshylyǵy avtobýstardyń barlyǵy derlik jolda ekendigin málimdedi. Avtobýstardyń qozǵalys kestesi burynǵydaı bolǵanymen, aldaǵy ýaqytta ózgerister engizilýi múmkin.
– Biz tender ótkizgenge deıin kólik basqarmasymen jáne qalalyq basshylyqpen qala turǵyndaryn tolǵandyrǵan keıbir máselelerdi qaıta qaraıtynymyzdy aıttyq. Keıbir shaǵyn aýdandar kólik qatynasymen az qamtylǵanyn jaqsy túsinemiz. Belgili bir mólsherde óz usynystarymyzdy engizemiz. Bıznes úshin de, qala turǵyndary úshin de bári qalypty ári yńǵaıly bolatyndaı etip jasaımyz, – dedi G.Pınchýk.
Qala ákimi Nurymbet Saqtaǵanovtyń aıtýynsha, «Semey Bus» JShS búginde zańsyz dep tanyldy. Barlyq esepshottary buǵattalyp tur. Bul avtoparktiń qyzmetkerleri endi qaıtadan burynǵy jumys ornyna aýysyp jatyr.
– Biz «Semey Bus» avtoparkine deıin «Semavtoparkte» jumys istedik. Aldymen jalaqy ýaqytynda tólendi, sodan keıin keshiktirile bastady. Sonda eki jyl jumys istedim, zeınetaqy jarnasy áli tólenbedi. Saqtandyrýdy jaqynda ǵana tóledim. Aýrýhanaǵa barýdyń ózi muń boldy. Nesıe alýdan qaldyq. Avtopark bankrotqa ushyrady, ne isteý kerektigin bilmeımiz. Amal joq, burynǵy jumys ornymyzǵa oralamyz. Eki ottyń ortasynda qalǵandaı boldyq. Qaıda baryp jumys iste dese, sonda baramyz, – deıdi avtobýs júrgizýshisi Ashat Sarbasov.
Jalpy, «Semavtopark» ókilderi kásiporyn tolyq kólemde paıdalanýǵa daıyn ekenin málimdedi. Alaıda qala baǵyttarynda «Semavtopark» JShS avtobýstarymen qatar, «Semey Bus» avtobýstary da jumys isteıdi. Jasyl avtobýstarda elektrondy bılettendirý áli bar. Sondaı-aq avtobýs baǵytyn «Infobus» qosymshasy arqyly kórýge bolady. Semeı ákimdigi elektrondy bıletteý «Semavtopark» JShS avtobýstaryna da engiziletindigin aıtyp sendirdi. Ázirge onda jolaqy qolma-qol aqshamen ǵana tólenedi. Jol júrý baǵasy – 80 teńge.
SEMEI
