Qostanaıda dástúrli túrde ótip kele jatqan halyqaralyq “Altyn mıkrafon” balalar án baıqaýy bıyl óte tartysty ótti.
Bolgarııadan, Reseıden, О́zbekstannan, Belorýssııadan, Qyrǵyzstannan jáne Qazaqstannyń barlyq oblystarynan kelgen 60 bala baıqaýdyń bas júldesi úshin óner dodasyna tústi. Tórt memlekettiń óner qaıratkerlerinen, tanymal mýzyka mamandarynan quralǵan qazylar alqasyna eki kún boıy baıqaýdyń júldesin bólý ońaıǵa túsken joq. – Balalardy olardyń oryndaý qabiletine ǵana emes, oryndaý mánerine qarap ta túrli deńgeıge bólýge bolady. Osy joly azııalyq jáne eýropalyq án aıtý mektebi toqaılasty. Bizdiń kishkentaı ánshilerdiń talantyna esh kúmán joq, tańdaı qaqtyrdy, –deıdi qazylar alqasynyń múshesi, halyqaralyq “Boztorǵaı” halyqaralyq balalar án baıqaýynyń dırektory Qarlyǵash Ábdikárimova. Balalardyń talanty syrttan kelgen mýzyka mamandaryn da, kórermenderdi de tamsantty. Al ótken jyly halyqaralyq án konkýrstarynyń bas júldelerin ıemdengen qostanaılyq úsh ánshi de osy “Altyn mıkrofon” baıqaýynyń “shapanynan shyqqandar” eken. Bul joly baıqaýdyń sońǵy kúngi gala-konsertin oblys ákimi Sergeı Kýlagın de kelip tamashalady, jeńimpazdarǵa júlde tapsyrdy. Birinshi oryndy kishi toptyń arasynda Bolgarııadan kelgen toǵyz jasar Martın Iordanov, orta topta almatylyq Azız Nastokov, eresek topta qostanaılyq Aıdana Jaqypova ıelendi.Baıqaýdyń bas júldesin Belorýssııadan kelgen jas ánshi Darıa Mıhaılova qanjyǵasyna baılady. Prodıýser Vıacheslav Avdeevtiń aıtýynsha, halyqaralyq “Altyn mıkrafon” baıqaýy ótken segiz jyldyń ishinde bas júlde birinshi ret Qazaqstannan syrtqa ketti. – Kezinde kishkentaı ánshilerdiń baıqaýynyń Qostanaıda ótýin qoldaǵanymyzǵa qazir erekshe qýanyp turmyn. Osy jyldar ishinde qanshama talanttardyń juldyzy jarqyrady, qanshama bulaqtyń kózin ashtyq. Kelesi jyly “Altyn mıkrafonnyń” taǵy da Qostanaıda ótýi úshin oǵan bólinetin qarjyny úsh ese kóbeıtemiz,–dedi oblys ákimi Sergeı Vıtalevıch. Al bulaqtar ózenge quıady... Názıra JÁRIMBETOVA, QOSTANAI.
