Bul joly biz bylǵary qolǵap sheberleriniń jekpe-jekteri týraly emes, kózge túsken bir joıdasyz kemshilik jaıynda aıta ketýdi jón sanadyq.
Kelse rınginde synǵa túsip jatqan boksshylarymyzdyń jeıdesinen kók týymyzdyń sýretin kóre almadyq. Al arqalarynda Qazaqstannan ekenin bildiretin «KAZ» degen qysqarǵan jazý da joq eken.
Sonda bul qalaı bolǵany? Halyqaralyq arenada elimizdiń atynan synǵa túsip jatqan órenderimizdiń sporttyq kıimine memleketti tanytatyn atrıbýttyq belgiler nege tańbalanbaǵan?
Jalpy, elimizdegi jetekshi sporttyń túri boksqa jyl saıyn qyrýar qarjy bólinedi. Sóıte tura, sapanyń bıik deńgeıine shyǵýdyń ornyna, mynadaı salǵyrttyqqa jol berilgendigi bokssúıer qaýymnyń oryndy renishin týdyrýy múmkin degen oıdamyz.
