Depýtat Qyzylorda oblysy Jańaqorǵan aýdanynda júzege asyrylýǵa tıis bolǵan «Syrdarııa jáne Talap toptyq sý qubyrynyń qurylysy» jobalaryna qatysty máselelerdi kóterdi.
Joba boıynsha aýdannyń 28 eldi mekeninde turyp jatqan 43 myńǵa jýyq halyq aýyz sýmen qamtylý kerek edi.
Syrdarııa toptyq sý qubyry 5,2 mlrd teńge qarjyǵa salynyp, paıdalanýǵa berildi. Al Talap toptyq sý qubyrynyń qurylys jumystaryna 5,5 mlrd teńge jumsalǵan.
Depýtattyń aıtýynsha, 11 mlrd teńgege jýyq qarajat jumsalyp, 2014 jyldan bastap júrgizilgen jobanyń túpkilikti nátıjesin halyq kórmeı otyr. Sebebi Talap sý óndirý kesheninde qazylǵan 8 uńǵymadan qum aralas sý shyǵyp jatyr. Sonymen qatar atalǵan eki toptyq sý qubyry sýmen jabdyqtaýdyń erekshe mańyzdy toptyq jáne oqshaý júıeleriniń tizbesine engizilmegen. Iаǵnı halyq aýyz sýǵa tolyq tarıfpen tólep otyr.
«Qazirgi tańda aýyz sý halyqqa kúnine 1-2 saǵatqa berilip, ýaqytpen shektelgen. Osy jobalardyń tolyq iske qosylmaýy saldarynan turǵyndar aýyz sýdy aýlada ornalasqan shahtalyq qudyqtardan nemese kishi uńǵymalardan alyp ishýge májbúr», deıdi senator.
Depýtat óz saýalyn Premer-Mınıstrdiń orynbasaryna joldaı otyryp, Talap jáne Syrdarııa toptyq sý qubyrlarynyń iske qosylýyn jyldamdatyp, Tizbege engizip, sýbsıdııalaýǵa qatysty máselelerin sheshýge yqpal jasaýyn surady.
