Marııanyń qıyndyqqa toly ómiri alty jyl buryn, eki aıaǵynan aıyrylǵan kezden bastaldy. Mundaı kúıge kóne almaǵanymen qıyndyqqa berilmedi. Aldymen Býrabaıdyń shyńyna shyqty. Al qazir Everestke jetip, 5364 m bıiktikke qol jetkizdi.
«Eger bir adamǵa jiger berip, alǵa qaraı umtylýyna áser etsem meniń úlken jeńisim sol bolmaq. Men sondaı qýanyshtymyn! Úıime oralǵanyma qýanamyn. Men shynymen baqyttymyn», dedi Marııa.
Sportshy alty aı boıy taý shyńyn baǵyndyrýǵa daıyndalyp, tipti artyq salmaq tastaǵanyn aıtty.
«Býrabaıdy baǵyndyrǵannan keıin toqtap qalmasymdy bildim. Ary qaraı umtylyp, Sınıýhadaǵy Taz taýyna shyqtyq. Endi odan da bıikke shyǵýymyz kerek degen sheshim qabyldadyq. Bir jarym jyl ýaqytymyz daıyndyqqa ketti. Týystarym men dostarym men úshin qatty ýaıymdady. Degenmen bıikke shyǵý, qozǵalý meniń jaǵdaıymdaǵy adam úshin qıyn. Jolymyzda tas ta, qum da kezdesedi. Bir jerden arbamen júrip ótetin múmkindik bolsa, endi bir tusta kerisinshe. О́z kúshimmen óte alatyn jerden ózim ótsem, qıyndaý tustarynda birge shyqqan dostarym kómektesti. Komandalyq jumys óz nátıjesin berdi. Jalpy, 10 kúnde josparymyzdy jaqsy oryndadyq. 5 myń metrge jaqyndaǵanda, taý aýrýy azdap sezile bastady. Biraq jyldam ótti. Barlyǵy kásibılik pen komandalyq jumystyń arqasynda. Meni kórgen nepaldyqtar: «Siz ne isteıin dep tursyz? Muny isteý múmkin emes. Joq. Qajet emes! Bolmaıdy! Bul qaýipti!» dedi. Olar bizdi raıymyzdan qaıtarǵysy kelip, qatty ýaıymdady. Elge rızamyn, bizdi jyly qabyldap, qoldarynan kelgenshe kómektesti», dedi Marııa.
