Kollajdy jasaǵan Záýresh SMAǴUL, «EQ»
Sáýirdiń basynan beri ǵana oblysta 2 361 adam qaýipti vırýs juqtyryp tirkelgen. Sońǵy bir aptanyń ózinde aýyrǵandar sany 1 myńnan asypty. Qaýiptiligi jóninen aldyńǵy qatarda – Oral qalasy, Báıterek jáne Bórli aýdandary qalyp otyr. Epıdemııalyq jaǵdaıdy baǵalaý matrısasyna sáıkes Aqjaıyq, Terekti, Qaztalov, Shyńǵyrlaý aýdandary da «qyzyl aımaqta» bolsa, Tasqala aýdany – «sary», Bókeı ordasy, Jańaqala Jánibek, Syrym jáne Qaratóbe aýdandary «jasyl aımaqta». Oblys boıynsha indet juqtyrǵandar sany sońǵy táýlikte 237-ge jetip, tórt mektep karantınge jabylǵan.
Arnaıy daıyndalǵan 11 ınfeksııalyq stasıonarda kereýetter 62 paıyzǵa tolǵan.
– Jyl basynan beri Batys Qazaqstan oblysynda 96 adam koronavırýstan qaza tapty. Marqumdardyń 28-i – qańtarda, 15-i – aqpan aıynda ómirden ótse, naýryzda indetten qaıtys bolǵandar sany 30-ǵa jetti. Al sáýir aıynyń 21-ine deıin ǵana 23 adam qaıtty, – deıdi oblystyq densaýlyq saqtaý basqarmasy basshysynyń mindetin atqarýshy Arman Qalıbekov.
Koronavırýs eń aldymen egde adamdarǵa qaýipti. Degenmen, vırýs juqtyrǵan mektep oqýshylary da az emes. О́ńirdiń bas dárigeriniń aıtýynsha, 4-toqsannyń basynan beri 162 oqýshy koronavırýs juqtyrǵan. Qazir 4 mektep karantınge jabylsa 29 mekteptegi 66 synyp, 6 balabaqshada 8 top jáne bir JOO-da 2 topta ýaqytsha oflaın oqý toqtatyldy.
– О́ńirde eki aptadan astam ýaqyt boıy indet juqtyrǵandar sany táýligine 100 adamnan tómen túspeı tur. Bizde endi juqpaly aýrýlar aýrýhanasynda tósektik oryndar jetispeıdi. Osyǵan baılanysty qosymsha 200 oryn daıyndap jatyrmyz. Vaksınany turǵyndar alyp jatyr. Vaksınanyń taǵy bir partııasy jaqyn arada keledi. Sondyqtan ekpe alǵysy keletinderdiń barlyǵyna emhana arqyly kezekke tirkelý qajet. О́kinishke qaraı, monıtorıngtik toptardyń jumysy KVI-men kúreste úlken nátıje bermeıdi. Otbasylyq, úılený toılary jalǵasýda, al qoǵamdyq kólikterde adamdardyń deni maska taqpaıdy, áleýmettik qashyqtyq ta saqtalmaıdy. Qala ákimi men aýdan ákimderine bul jumysty, ásirese túrli is-sharalar ótetin kúni kúsheıtýdi tapsyramyn. Oral qalalyq №2 jáne №4 emhanalardyń Call-ortalyqtary qońyraýlarǵa jaýap bermeıtini belgili boldy. Bul prosess shuǵyl túrde rettelýi kerek. Barlyq telefondar kórsetilgen ýaqytta jaýap berýi tıis. Koronavırýs aımaqtyń ómirine qatty áser etti, ekonomıkaǵa, bızneske soqqy berdi. Eger osy aptada KVI naýqastarynyń tómendeýi tirkelmese, biz sharalardy kúsheıtemiz. Memlekettik organdarǵa, jedel shtab múshelerine koronavırýsqa qarsy kúres boıynsha jańa usynystar men ádisterdi engizý qajet, – dedi koronavırýsqa baılanysty ótken arnaıy shtab otyrysynda oblys ákimi Ǵalı Esqalıev.
Aýrýdyń betin qaıtarý úshin karantın talaptaryn tolyq saqtaýmen birge, jappaı vaksına alý qajettigin mamandar qaıtalaýdan jalyǵar emes. Qazirdiń ózinde oblysta 23 790 adam vaksınanyń birinshi ekpesin alǵan. Halyqty ekpemen qamtamasyz etý úshin oblys ortalyǵy men aýdandarda arnaıy 30 kabınet ashylǵan.
– О́ńirimizge 23 sáýir kúni vaksınanyń 9 800 dozasy keledi. Onyń 4 900 dozasy – birinshi kezeńge, 4 900-y – ekinshi márte egýge arnalǵan. 25 sáýirde taǵy 15 myń doza, 28-inde taǵy 14 myń doza keledi, – deıdi Arman Qalıbekov.
Batys Qazaqstan oblysy
