Memleket basshysyna elimizdegi sanıtarlyq-epıdemıologııalyq ahýal, halyqqa vaksına salý barysy, respýblıkanyń áleýmettik-ekonomıkalyq damýynyń ózekti máseleleri jaıynda baıandaldy.
Qasym-Jomart Toqaevqa halyqqa ekpe egýge qatysty qabyldanyp jatqan sharalar jaıynda aıtyldy. Asqar Mamınniń aıtýynsha, sáýirden bastap aı saıyn 2 mıllıon adamǵa vaksına salý josparlanyp otyr.
Prezıdentke otandyq QAZVAC vaksınasynyń óńirlerge jetkizilýi jaıynda aqparat berildi. Premer-Mınıstr Qazaqstannyń COVID-19 indetine qarsy vaksına shyǵarǵan on memlekettiń jáne óz ázirlemelerin tirkegen bes eldiń qataryna kirgenin aıtty. Sonymen qatar ol 26 sáýirden bastap «ASHYQ» qosymshasyn barlyq oblystar keń kólemde qoldanyla bastaıtynyn atap ótti. Bul «qyzyl» jáne «sary» aımaq kezinde ekonomıkanyń ártúrli sektorynyń qaýipsiz jumys isteýine múmkindik bermek.
Memleket basshysyna berilgen aqparattarǵa sáıkes, juqpaly aýrýlar aýrýhanasyndaǵy oryndar 42 paıyzǵa, jan saqtaý bólimderi 28 paıyzǵa tolyq. Dári-dármektiń, jeke qorǵanys quraldarynyń qajetti qory jasaqtalǵan, PTR-zerthanalary kúnine 123 myń adamǵa deıin qyzmet kórsete alady. 25 myń tósek-oryn qory bar, barlyq óńirde zamanaýı quraldarmen jabdyqtalǵan jańa juqpaly aýrýlar aýrýhanalary jumys istep jatyr.
Asqar Mamın Qasym-Jomart Toqaevqa 29-30 sáýir kúnderi ótetin Eýrazııalyq parlamentaralyq keńestiń otyrysyna daıyndyq barysyn baıandady. Sonymen qatar ınvestısııa tartý, halyqty jumyspen qamtý máseleleri de qarastyryldy.
Kezdesý sońynda Prezıdent Úkimetke otandyq vaksına óndirisin arttyrýdy jáne onyń halyqqa qol jetimdi bolýyn erekshe baqylaýda ustaýdy tapsyrdy.
