Kezdesýde Qazaqstannyń Tuńǵysh Prezıdentine 2025 jylǵa deıingi ulttyq qaýipsizdik strategııasy men Ulttyq qaýipsizdik qaterleriniń aldyn alý jónindegi is-áreket jospary boıynsha júrgizilip jatqan jumystar, sondaı-aq Qaýipsizdik Keńesiniń kezekti otyrysyna daıyndyq barysy týraly aqparat berildi. Onda Qarýly Kúshterdi, basqa da ásker jáne kúshtik qurylymdardy 2030 jylǵa deıin qurý, damytý tujyrymdamasynyń jobasy, sonymen birge shekaradaǵy qaýipsizdikti qamtamasyz etý máseleleri qaralady.
Sonymen qatar Elbasyǵa azamattardyń quqyǵy men bıznesti qorǵaýdy kúsheıtý, ýchaskelik polısııa ınspektorlarynyń rólin arttyrý, quqyq qorǵaý júıesin reformalaý jumystary, sondaı-aq kıberqaýipsizdik pen aqparattyq keńistikti qorǵaý salasynda qabyldanǵan sharalar týraly baıandaldy.
Kezdesýde Nursultan Nazarbaev sý tasqyny men selden qorǵaný, órt qaýipsizdigi syndy ózekti máselelerge, sondaı-aq pandemııa aıaqtalǵannan keıingi kezeńde ulttyq ekonomıkany ári qaraı damytý máselelerine nazar aýdardy.
– Ulttyq qaýipsizdiktiń barlyq aspektilerine, sonyń ishinde azyq-túlik qaýipsizdigi men quqyq qorǵaý júıesiniń jumysyna odan ári taldaý júrgizý kerek. Qaýipsizdik Keńesiniń kelesi otyrysynda Qarýly Kúshterdi damytý máseleleri talqylanady. Aldaǵy jıynǵa sapaly daıyndyq júrgizý qajet, – dedi Qazaqstannyń Tuńǵysh Prezıdenti.
Qaýipsizdik Keńesiniń hatshysy quqyq qorǵaý júıesin kezeń-kezeńimen reformalaýdyń alǵashqy nátıjeleri týraly baıandady. Á.Isekeshevtiń aqparatyna sáıkes, negizgi prosessýaldyq sheshimder boıynsha prokýrormen kelisý ınstıtýtyn engizý azamattardyń qylmystyq prosestegi konstıtýsııalyq quqyqtarynyń buzylýyn úshten birge, negizsiz qamaýǵa alynǵan adamdar sanyn eki ese azaıtýǵa jol ashty.
– Bıyl qylmys deńgeıiniń tómendeý úrdisi saqtalyp otyr. Birinshi toqsanda bul kórsetkish 13,3 paıyzǵa azaıdy, – dedi Qaýipsizdik Keńesiniń Hatshysy.
Sondaı-aq Á.Isekeshev 28-29 sáýirde Dýshanbede ótetin Ujymdyq qaýipsizdik týraly shart uıymy Qaýipsizdik keńesi hatshylary komıtetiniń kezekti otyrysyna daıyndyq barysy týraly baıandady. Atalǵan jıynda óńirlik qaýipsizdikke qatysty ózekti máseleler, terrorızm men esirtki qylmysyna qarsy kúres jáne ózara is-árekettiń ózge de aspektileri talqylanady.
Sońynda Nursultan Nazarbaev Qaýipsizdik Keńesiniń Apparatyna birqatar naqty tapsyrma berdi.
