Altaı aýdanynyń polısııa bólimine 63 jastaǵy zeınetker aksııa aıasynda magazıninde úsh patrony bar kobýrasymen qosa oıyq qysqa uńǵyly tapanshany tapsyrǵan.
Sot-ballıstıkalyq saraptama nátıjesi boıynsha bul qarý 1900 jyly daıyndalǵany anyqtaldy. 7,65 mm kalıbrli, zaýyttyq nómiri «166710», ıaǵnı «Braýnıng» júıesine jatatyn oıyq atys qarýy jáne ózdiginen oqtalatyn tapansha. Zaýyttyq ádispen jasalǵan qarý atý úshin jaramdy.
Aıta keteıik, qarý Uly Otan soǵysy kezinde AQSh pen Belgııa armııasynyń qolynda bolǵan.
Aýdan turǵyny qarý-jaraqty UOS qatysýshysy bolǵan atasynyń jertólesinen tapqanyn aıtqan. Oq-dárileri bar atys qarýy ShQO Polısııa departamentiniń murajaıyna tarıhı qundylyq retinde saqtalady.
- Halyqtan zańsyz saqtalǵan atys qarýy men oq-dárilerdi satyp alý jónindegi komıssııa quramy er adamǵa qarý úshin 120 000 teńgeden astam qarajat tóleıdi. Osylaısha, úsh kún ishinde tirkelmegen qarý men oq-dárilerdi erikti túrde tapsyrý aksııasyn ótkizý barysynda oblys boıynsha halyqtan 7 mln.teńgege 110 birlik qarý (oıyq – 15 jáne tegis uńǵyly - 95) qabyldandy, - dedi ShQO PD bastyǵy Saǵat Madıev.
Eske sala keteıik, aǵymdaǵy jyldyń 20 sáýirinen bastap ShQO aýmaǵynda halyqtan atys qarýyn, oq-dárilerdi jáne jarylǵysh zattardy satyp alý boıynsha respýblıkalyq aksııa ótýde. Aımaqtyń kez-kelgen eresek turǵyny oq-dárilerdi nemese qarý-jaraqtardy tapsyryp, sol úshin aqshalaı syıaqy ala alady.
Sonymen qatar, tirkelmegen qarýdy polısııa bólimine ákelgen adam qylmystyq jaýapkershilikten bosatylady.
Koronavırýstyq ınfeksııanyń taralýyna jol bermeý maqsatynda bul aksııa sanıtarlyq-epıdemıologııalyq talaptardy saqtaı otyryp ótip jatyr.
