Alǵash ret «Adamǵa tabyn, jer, endi!» dep jyrlaǵan qazaqtyń qabyrǵaly qalamgeri Oljas Súleımenov árbir balanyń sanasyna «óskende ǵaryshker bolamyn» degen asqaq armandy uıalatty. Bulttyń arǵy jaǵyndaǵy álemdi zertteýge qushtar jastar kóbeıip, oqýshylar astronomııaǵa áýestendi. Árıne munyń bári 1961 jyly 12 sáýirde ǵaryshqa ushqan alǵashqy adam Iýrıı Gagarın erliginen týǵan ádemi áser edi. Endi búgin sol aıaýly sátter muraǵattar minberinde qol bulǵap tur.
Muraǵattar demekshi, osyǵan baılanysty Reseı elinde «Juldyzdarǵa jol» atty halyqaralyq fotokórme uıymdastyryldy. Ýlıanov oblysynyń memlekettik arhıvteri uıymdastyrǵan aıtýly sharaǵa Nur-Sultan qalasy memlekettik arhıvi de óz úlesin qosty. Qalalyq arhıvte jatqan qundy qujattar men baǵaly sýretterdi orys halqy tamashalap, qazaq eline rızashylyǵyn bildirdi.
«Eki el arasyndaǵy arhıv salasyndaǵy yntymaqtastyq osyndaı ıgi sharalarǵa muryndyq bolýymen erekshe. Tuńǵysh ushqysh Iýrıı Gagarınniń «Vostok-1» tasyǵyshy Qyzylorda aımaǵynda ornalasqan Baıqońyr ǵarysh aılaǵynan ushyrylǵany el jadynda. Sodan da bolar ǵarysh jaıly áńgime aıtqanda kópshiliktiń kóńili eleńdeı túsedi. Bizdiń muraǵatta kosmonavtıka salasynda qyzmet etken mamandardyń baǵaly zattary bar. Ǵaryshkerlerdiń ómirine qyzyqqan árbir adam kelip kórýine bolady», deıdi qalalyq arhıv dırektory Meıram Bektembaev.
Fotokórmege «Ýlıanovskaıa Pravda» gazetiniń burynǵy bas redaktory Iýrıı Rombovskııdiń TASS foto muraǵatynan alǵan biregeı qujattary, Baıqońyr kosmodromynda uzaq jyldar boıy qyzmet etken Rınat Ilıazovtyń fotosýretteri men jeke qujattary qoıylǵan. Kórmede ǵaryshkerlerdiń qoltańbalaryn qosa alǵanda barlyǵy 120-dan astam qujat usynylypty.
«Adamnyń alǵashqy ǵaryshqa ushýynyń 60 jyldyǵynda ǵarysh salasynyń ótkeni, búgini men bolashaǵy týraly aıtý óte mańyzdy. Tarıhty saqtaýshylar retinde arhıvshiler bizge, ótken ǵasyrdyń orta sheninen bastap, búgingi kúnge deıin kosmonavtıkanyń qol jetkizgen jetistikterin anyq kórsetedi. Bul jastar úshin óte mańyzdy», deıdi Ýlıanov oblysynyń óner jáne mádenıet basshysy Evgenııa Sıdorova.
Iá, arhıvtegi aıǵaqtarǵa qarap ǵaryshkerlerdiń júrip ótken jolynyń syzbasyn kórýge bolady. Oǵan úńilgen saıyn kóziń ashylyp, jan dúnıeń bir ysynyp, bir sýynary haq. Quddy bala kúngi armanyńmen qolustasyp turǵandaısyń. Onda ǵaryshkerlerdiń aıtyp ketken sara sózi men ǵıbratty ǵumyrynyń úzigi bar. Qasıetti qujattarǵa til bitip sóıleıdi, jan dirili men aıǵaqty syryn aıqara ashyp, tildesedi.
