Pandemııa bastalǵaly beri qala boıynsha aýyrǵandar sany 3170 adam, osynyń 1102-si jyl basynan beri anyqtalǵandar. Qalada táýligine orta eseppen 250-300 synama júrgiziledi. Synama qorytyndysyna jasalǵan zertteý sáýir aıynda COVID-19 indetimen syrqattanýshylyq kórsetkishi qańtardan – 3,8, aqpan aıyndaǵy kórsetkishten 3,7, al naýryzdaǵy aıyndaǵy deńgeıden 4,9 ese asqanyn kórsetti. Jalpy aýyrǵandar arasynda eresekter kóp – 81 paıyz. Balalar úlesi – 19,0, al jasóspirimder 1,9% bolyp tur.
– Vırýs juqtyrǵandardyń kóbeıýiniń negizgi sebebi turǵyndardyń karantındik sharalardy saqtamaýy. Qaladaǵy 12 egý kabınetinde vaksınasııalaý jalǵasýda, sondaı-aq jyljymaly egý pýnktteri de jumys istep tur. Alda iri saýda-oıyn ortalyqtary men saýda úılerinde ekpe oryndaryn ashý josparda tur. Qazir bul baǵytta daıyndyq jumystary júrgizilýde. Ondaǵy sanıtarııalyq-epıdemııalyq talaptar da medısınalyq uıymdaǵydaı qatań saqtalatyn bolady. Qala boıynsha 1-shi aqpannan bastap 15 174 adam egýdiń birinshi komponentimen, 5002 turǵyn ekinshi komponentpen qamtylyp otyr, – dedi Qyzylorda qalasynyń bas memlekettik sanıtarııalyq dárigeri Erlan Uzaqbaev.
Jyl basynan beri shekteý talaptarynyń saqtalýyna jasalǵan tekserý barysynda 62 aıyppul salynǵan. Elý eki nysan jospardan tys tekserilip, uıǵarym berildi.
Dál qazir 12 shuǵyl habarlama boıynsha tıisti tekserý taǵaıyndaldy. Jalpy jyl basynan beri karantındik rejım talaptaryn buzǵandarǵa QR Ákimshilik quqyq buzýshylyq tarýly kodeksiniń 425 babynyń 1-shi bóligimen 5 332 260 teńge aıyppul salynyp otyr.
