Bul – jas sportshylardan quralǵan Qazaqstan ulttyq quramasy úshin tabysty nátıje dep aıtýǵa bolady. О́ıtkeni erler quramamyz upaı kórsetkishi boıynsha jalpykomandalyq esepte jarys qojaıyndary О́zbekstan men azýly Qytaı sportshylaryn artqa tastap, bas júldeni ıelendi.
Olımpıadashylardyń nátıjesi
Jalpy, bıylǵy Azııa chempıonaty Tokıo Olımpıadasyna joldama beretin reıtıngtik týrnır bolǵan soń, ulttyq quramanyń bas bapkeri Baqyt Ahmetov eresekter arasynda joldamaǵa úmitti Arlı Chonteı, Igor Son jáne qyzdardan Zúlfııa Chınshanlo sekildi saqa sportshylardy Tashkentke apardy da, qalǵan salmaqtarda Parıj Olımpıadasyna barýy múmkin degen jas sportshylardy dodaǵa qosty.
Aldymen Olımpıadaǵa barýy múmkin bolǵan sportshylardyń nátıjelerine toqtalsaq. Qazaqstan quramasynan Azııa chempıonatyn 55 kılo salmaq dárejesinde baq synaǵan Arlı Chonteı bastap berdi. Jerlesimiz qossaıys qorytyndysy boıynsha 255 (115+140) kılo ziltemirdi eńserip, Azııa chempıony atansa da, óziniń úzdik nátıjesin kórsete almady. Tipti Arlıdiń nátıjesi jyl saıyn tómendep bara jatqan sııaqty. Máselen, 2016 jylǵy Rıo Olımpıadasynda Chonteı 278 (130+148) kılomen tórtinshi oryn alsa, 2019 jyly Taılandta jalaýy jelbiregen álem chempıonatynda 263 (118+145) kılo ziltemirdi kóterip, besinshi orynǵa taban tiregen edi. Álem birinshiliginde Soltústik Koreıa ókili Om Iýn Chhol 294 kılomen chempıon atanyp qana qoımaı, álem rekordyn ornatqan bolatyn. Al Olımpıada chempıony qytaılyq Lýn Sınsıýan 2016 jyly 307 kılony eńsergen. Osy nátıjelerden keıin Arlı Chonteıdiń dál qazirgi jaǵdaıy qandaı deńgeıde ekenin baǵamdaı berýge bolady. Tashkenttegi týrnırge joǵaryda biz atyn ataǵan eki sportshy kelgen joq. Eger Soltústik Koreıa men Qytaı sportshylary baq synaǵanda jerlesimizdiń tolyq áleýeti belgili bolar edi.
Qazaqstan quramasynan erler arasyndaǵy Olımpıada joldamasyna taǵy bir úmitker atletimiz Igor Son (61 kg), ókinishke qaraı, óziniń bar múmkindigin pash ete almady. 2019 jyly Taılandta ótken álem chempıonatynda 55 kıloda 266 kılo ziltemirdi kóterip, kúmis júldege ıe bolǵan ol bıylǵy Azııa chempıonatyn tórtinshi orynmen aıaqtady. Biraq otandasymyz kúmis júldegerden eki, qola júldegerden bir kılo kem kóterdi. Julqa kóterý baǵdarlamasynda 132 kılomen kishi qolaǵa qol jetkizgen jerlesimizdiń serpe kóterýde joly bolmady. Birinshi múmkindiginde 152 kılony ońaı eńsergenimen, qalǵan eki múmkindiginde de 156 kılo ziltemirdi baǵyndyra almady. Sóıtip qossaıysta 284 kılony eńserdi. Bul salmaqta áıgili qytaılyq sportshy Lı Fabın top jardy. Qossaıys qorytyndysy boıynsha ol 312 (142+170) kılo ziltemirdi baǵyndyrdy.
Endi Qazaqstan erler quramasynan Olımpııa oıyndaryna kim baratynyn bapkerler quramy anyqtaıtyn bolady. Eger bar máseleni dál osy Azııa chempıonaty sheshetin bolsa, onda júlde boıynsha Tokıoǵa Arlı Chonteı laıyq. Al nátıje boıynsha Igor Sonnyń kórsetkishi úzdik bolyp tur.
Qyzdar quramasynda Olımpııa oıyndaryna Zúlfııa Chınshanlodan (55 kg) basqa úmitker joq. Degenmen bıylǵy Azııa chempıonatynda úsh dúrkin álem chempıony, eki dúrkin Azııa oıyndarynyń kúmis júldegeri jankúıerler úmitin aqtaı almaı, júldeli oryndardan quralaqan qaldy. Chınshanlo julqa kóterý baǵdarlamasynda 92 kılo ziltemirdi eńserip, kishi qola medal ıelendi. Serpe kóterýdegi birinshi múmkindiginde 118 kılony baǵyndyrǵanymen, qalǵan eki múmkindiginde 122 kılony eńserýge shamasy jetpedi. Sóıtip 210 kılo nátıjemen qurlyq básekesinde besinshi oryndy qanaǵat tutty. Altyn júlde 222 (98+124) kılo kótergen qytaılyq sportshy Lıao Sıýıýnniń enshisinde ketti.
Bolashaq chempıondar
ósip keledi
Bıylǵy sary qurlyq birinshiliginde Qazaqstan erler quramasynan 10 sportshy baq synasa, sonyń segizi jastar quramasynan bıyl ǵana eresekter dýyna qosylǵan jastar edi. Kóbi úlkender arasyndaǵy alǵashqy iri jarysqa qatysyp tursa da, joǵary nátıje kórsetti.
Máselen, 55 kıloda Arlı Chonteıden 11 kılo kem kótergen Abylaı Áýelhanov 244 kılo (108+136) nátıjemen Azııa chempıonatynyń kúmis júldesin jeńip aldy. Ár jarysta joǵary nátıje kórsetýge tyrysatyn jerlesimiz bul joly da bas júldeden úmitti edi. Julqa kóterýde 108, serpe kóterýde 136 kılony kótergen otandasymyz 244 kılomen ekinshi orynǵa taban tiredi. Osylaısha, Áýelhanov eresekter arasyndaǵy alǵashqy Azııa chempıonatynda kúmis medalǵa qol jetkizdi. Bul jas sportshy úshin jaqsy nátıje dep aıta alamyz.
89 kıloda el namysyn qorǵaǵan 20 jastaǵy Nurǵısa Ádiletuly da Azııa chempıonatynyń kúmis júldegeri atandy. Ol serpe jáne julqa kóterýde 372 (169+203) kılony eńserdi. Serpe kóterý baǵdarlamasynda Nurǵısa kishi altyn júldeni ıelense, julqa kóterýde 203 kılomen qolaǵa qol jetkizdi. 2019 jyly Taılandta ótken álem chempıonatynda grýzııalyq sportshy Revaz Davıdatze 371 kılomen qola medal alǵan edi. Iаǵnı Azııa chempıonatynda 372 kılony baǵyndyrǵan Nurǵısadan aldaǵy ýaqytta budan da joǵary nátıje kútýge bolady. Altyn júldeni Rıo Olımpıadasynyń chempıony Kıanýsh Rostamı (Iran) ıelendi – 373 (167+206) kılo.
102 kıloǵa deıingi salmaq dárejesinde óner kórsetken Artem Antropov qossaıys nátıjesi boıynsha 390 (168+222) kılony baǵyndyryp, qola júldege ıe boldy. Al jastar arasyndaǵy Azııa chempıonatynda 16 jasynda top jaryp, julqa kóterý jattyǵýynda álem rekordyn ornatqan Rahat Bekbolat jarysty bar-joǵy besinshi orynmen túıindedi. Ol qurlyq básekesinde 386 (173+213) kılo kóterdi.
Sonymen qatar 55 kıloda baq synaǵan Alekseı Drozdov (278 kg) pen 73 kılodaǵy Saıramkez Aqmolda (334) Azııa chempıonatyn altynshy, 81 kıloda el namysyn qorǵaǵan Aleksandr Ývarov (320 kg) – tórtinshi jáne 109 kılodaǵy Ibragım Bersanov (370 kg) toǵyzynshy orynmen túıindedi.
Qyzdarymyz da jaman nátıje kórsetken joq. Kil el chempıondarynan quralǵan qyzdar quramasy bir kúmis, eki qola medal jeńip aldy. Máselen, 81 kıloda Karına Quzǵanbaeva 232 upaımen kúmis júldeger atansa, Ekaterına Bykova (71 kg) men Aızada Múptildá (+87 kg) qolaǵa qol jetkizdi.
Osylaısha, Qazaqstan ulttyq quramasynyń sportshylary Azııa chempıonatynda 1 altyn, 3 kúmis jáne 3 qola medal jeńip aldy. Júlde sany boıynsha jerlesterimiz jalpy esepte tórtinshi orynǵa turaqtaǵan bolsa, upaı kórsetkishi boıynsha erler quramamyz, joǵaryda aıtyp ótkenimizdeı, jalpykomandalyq esepte 658 upaımen birinshi oryndy jeńip aldy. Jalpy, Tashkenttegi tartys aldynda Baqyt Ahmetov shákirtteri jarys qorytyndysy boıynsha úzdik úshtiktiń qatarynan kórinse, sonyń ózi úlken jetistik bolar edi dep aıtqan bolatyn. Sóıtsek, bas bapker aryq aıtyp, semiz shyǵýdy kózdegen eken.
Azııa chempıonatynan soń ulttyq qurama bas bapkeri Baqyt Ahmetov týrnırdi qorytyndylap, sportshylardyń jetistigine joǵary baǵa berdi. «Shákirtterim Azııa chempıonatynda alǵa qoıǵan maqsatty túgel oryndady. Erler komandasy kósh bastasa, áıelder komandasy tórtinshi orynǵa ıe boldy. Bir jyldyq úzilisten soń komanda músheleri jarysty ábden saǵynǵany kórinip turdy. Árbir sportshy sońǵy sátke deıin berilgen joq. Quramadaǵy tájirıbeli sportshylar óz myqtylyqtaryn taǵy bir dáleldedi. Keıbir jastarymyz úshin bul óz mansabyndaǵy alǵashqy halyqaralyq týrnıri ekenin de umytpaǵan jón. Árıne, qateliktermen jumys isteımiz. Al joldama máselesine keler bolsaq, qazirgi tańda irikteý týrnırleri áli aıaqtalǵan joq. Alda Afrıka chempıonaty men jasóspirimder arasyndaǵy álem birinshiligi bar. Upaılar tolyǵymen sol kezde esepteledi», dedi bas bapker.
