Jańa qurylym alǵashqy qadamyn elorda men ózge óńirlerde medısına qyzmetkerleriniń eńbegin baǵalap, alǵys retinde azyq-túlik salynǵan sebetter taratýmen bastady. Onda kez kelgen taǵam emes, dárigerlerdiń keńesimen tańdalǵan paıdaly, vıtamınge baı jemister bar.
Jas Otan jastar qanatynyń tóraǵasy Nurjan Jetpisbaev bul qozǵalys elimizdiń barlyq belsendi jáne janashyr jastaryn biriktiretinine senimdi.
– Búgin biz Jas Otan janynda qurylyp jatqan Biz Birgemiz! volonterler qozǵalysynyń iske qosylǵanyn málimdeımiz. Nur Otan partııasynyń Kóshbasshysy, Elbasy Nursultan Nazarbaev volonterlik qyzmetpen aınalysatyn jastardy qoldaýdy tapsyrǵan edi. Máselen, stıpendııany ulǵaıtý nemese eriktilikti eńbek ótilinde esepke alý sekildi sheshimderdi atap ótýge bolady. Bul qozǵalys osy jumysty júıeleýge jáne baqylaýǵa múmkindik beredi,– deıdi uıym jetekshisi.
Sonymen qatar pandemııa kezinde qaıyrymdy jandardyń ıgi isteri volonterlik qyzmettiń qanshalyqty mańyzdy ekenin kórsetkendeı. Jas Otan tóraǵasy uıymnyń 2025 jylǵa deıingi «Jastar – Otanǵa!» baǵdarlamasynda volonterlik qyzmetke erekshe kóńil bólingenin atap ótti. Qujatta kórsetilgen mindetterge sáıkes, 2025 jylǵa deıin volonterlikpen turaqty túrde aınalysatyn jastardyń 3,5 paıyzyn qamtý josparlanǵan eken. Bul – búkil el boıynsha shamamen 100 myń adam.
Biz Birgemiz! qozǵalysynyń ataýy Elbasynyń bastamasymen bastaý alǵan ótken jylǵy respýblıkalyq aksııanyń jalǵasy ekenin aıta ketken jón. О́tken jyly bul aksııaǵa búkil el boıynsha 5 myńnan astam volonter tartylǵan. Nurjan Jetpisbaevtyń aıtýynsha, osy eriktilermen júıeli jumysty odan ári jalǵastyrý josparda bar.
Alǵashqy is-shara kezinde jasotandyqtar men Biz Birgemiz! volonterleri Nur-Sultan qalasy ákimdiginiń kópsalaly medısınalyq ortalyǵyna baryp, dárigerlerdiń eren eńbegi úshin «alǵys sebetterin» usyndy. Volonter Aqerke Eskendirova pandemııamen alǵy shepte kúresken medısına qyzmetkerlerine qoldaý artyq etpeıtinin alǵa tartty.
– Biz bul áreketimizben qyzmetine adal dárigerlerge sheksiz alǵysymyzdy bildirgimiz keldi. Sebebi olardyń kúrdeli jaǵdaıda álemdi jaýlaǵan indetpen kúresip jatqandaryna bir jyldan asty. Bul kimdi bolsyn qajytatyny túsinikti. Alaıda sertine berik abzal jandardyń naýqastardy talmaı emdep jatqanyn kórip otyrmyz, – deıdi volonter.
Aldaǵy kúnderi elimizdiń barlyq óńirinde 500-den astam erikti óz otbasylarynan oqshaýlanýǵa májbúr bolǵan 1700 medısına qyzmetkerine «alǵys sebetterin» syıǵa tartady.
Aıta ketý kerek, ótken jyly medısına qyzmetkerlerin qoldaýǵa baǵyttalǵan «Dárigerlerge myń alǵys» respýblıkalyq aksııasyna 600-den astam jasotandyq belsendi qatysyp, 6 500-den astam azyq-túlik sebeti úlestirilgen edi. Onyń ishinde 1,5 tonnadan astam qymyz, 150 lıtr shubat jáne 11,5 tonnadan astam sý boldy. Jalpy, byltyr 7 myńǵa jýyq medısına qyzmetkeri men 100-den astam aýrýhana qamtylǵan-dy.
