Erekshe qajettilikteri bar balalarǵa arnalǵan ortalyq Elbasy Nursultan Nazarbaevtyń «Qamqorlyq» bastamasy aıasynda quryldy. Mekeme byltyr táýelsizdik kúni qarsańynda ashylǵan. Nursultan Nazarbaev Qorynyń dırektory, Parlament Májilisiniń depýtaty Darıǵa Nazarbaeva jáne Almaty oblysynyń ákimi Amandyq Batalov ortalyq jumysynyń alǵashqy nátıjesimen tanysty. Olar ońaltý kabınetterin aralap, qyzmetkerlermen júzdesti.
Almaty oblysy Jambyl aýdandyq ortalyq aýrýhanasyndaǵy (Uzynaǵash aýyly, Qarasaı batyr kóshesi, 259) ǵımarattyń eki qabatynda ornalasqan ortalyqtyń aýmaǵy – 800 sharshy metr. Munda serebraldy paralıch, aýtızm, epılepsııa, aqyl-oıy kem, sóıleý tili damymaǵan, bronhókpe men júrek-qan tamyrlary júıesi aýrýlary bar balalar em qabyldaıdy. Innovasııalyq tehnologııalarǵa negizdelgen sapaly ári tıimdi keshendi ońaltýdan ótýge jaǵdaı jasalǵan. Balalar men ata-analar medısınalyq emdeý sharalary, túzetý sabaqtary, oıyn-saýyq saýyqtyrýǵa arnalǵan bólmelermen qamtylǵan.
Qazirgi tańda Jambyl men jaqyn mańdaǵy aýdandarmen qatar, Almaty qalasynan jáne ózge de oblystan kelgen 50 bala ata-anasymen birge ońaltýdan ótip jatyr. Serebraldy sal aýrýyna shaldyqqan bir jarym jastaǵy Batyrhannyń anasy mekeme jumysyna dán rıza. Mańǵystaý oblysynyń turǵyny bir kezderi Uzynaǵashta turǵan jáne «Qamqorlyq» ortalyǵynyń ashylýyn bilgen ájesiniń aıtýymen arnaıy kelgen eken. Kelinshek Nursultan Nazarbaev Qorynyń dırektory erekshe qajettiligi bar balalar men ata-analaryna kórsetken kómegine shyn júrekten alǵys aıtyp, ulynyń ońaltýdan keıingi jaǵdaıyn baıandady. Qazir balasy selqos jatýdy qoıǵan, tósekten ózdiginen túsip, aıaǵyn jerge tireı alady, eńbekteýge tyrysady.
– Munda úsh aptalyq kýrstan ótip jatyrmyz. Barlyq jerde em-dom qabyldaý aqyly ári biz úshin óte qymbat, al teginine uzyn-sonar kezektiń kesirinen kire almaımyz. Al bul ortalyqta barlyǵy joǵary deńgeıde ári tegin. Eń áýeli ortalyqtyń mamandaryna alǵys aıtamyn. Talaı jerde boldyq, salystyryp aıtarymyz bar. Bul eń úzdik ortalyq, – dedi Aıalanyń anasy Jibek Qanı.
Jeti jastaǵy Nursultan Sheráliniń ájesi Fatıma da keshen mamandarynyń joǵary kásibıligine tánti. «Nemerem 15 kún boıy ońaltý kýrsynan ótip jatyr. Aıaǵyn basa almaıtyn, qazir em-shara arqyly qaz-qaz basyp keledi. Revmatolog, massaj, terapııa syndy óte jaqsy keshendi em alýda», deıdi ol.
Aıta keteıik, ortalyq jyl saıyn erekshe qajettiligi bar 600 balany tegin qabyldaýǵa ázir.
– Bul – 2020 jyly Elbasynyń bastamasymen «Qamqorlyq» jobasy aıasynda ashylǵan 8 ońaltý ortalyǵynyń biri. Bıyl Nursultan Nazarbaev Qory osy baǵdarlamanyń birinshi kezeńin iske asyrý barysynda jınaqtalǵan tájirıbeni qoldana otyryp, ońaltý modelin basqa aımaqtarǵa paıdalanýda. Shaǵyn qalalar men aýdan ortalyqtarynda qosymsha 10 ortalyq ashý josparda, ońaltý qyzmetiniń sapasyn arttyryp, ortalyq jumysynyń turaqtylyǵyn qamtamasyz etetin mamandar daıarlaýǵa basa mán berip otyrmyz, – deıdi «Qamqorlyq» korporatıvtik qorynyń dırektory Araılym Erkinova.
Uzynaǵash kentindegi ortalyqta 126 bala ońaltý kýrsynan ótti. Jalpy, Tuńǵysh Prezıdent N.Nazarbaevtyń bastamasyn júzege asyrý barysynda 2020 jyldyń jeltoqsanynan 2021 jyldyń naýryzyna deıingi aralyqta segiz «Qamqorlyq» ortalyǵynda 1 186 bala em-shara aldy.
Almaty oblysyna jumys sapary aıasynda D.Nazarbaeva Uzynaǵash aýylyndaǵy perzenthanaǵa da bardy. Onda Nursultan Nazarbaev Qorynyń dırektoryna (elektrokardıografııa, ýltradybystyq dıagnostıkalyq júıe, sandyq rentgen jáne flıýorografııalyq apparattar jáne 12 arnaly EKG apparaty) syndy qajetti medısınalyq qurylǵylar ornatylǵan avtobýstar, ıaǵnı 17 jyljymaly medısınalyq keshen tanystyryldy.
Árbir medısınalyq avtobýsta jalpy qabyldaý bólmesi, akýsher-gınekolog, sáýlelik dıagnostıka, jalpy tájirıbe dárigeriniń bólimshesi, dárihana, analız qabyldaý aımaǵy jáne portatıvti ýltradybystyq ekspert synyby ári halyqty vaksınalaýǵa arnalǵan beketter de bar.
D.Nazarbaevanyń jumys sapary Shamalǵan aýylyndaǵy sport-saýyqtyrý kesheni men Tuńǵysh Prezıdent – Elbasynyń «Atameken» tarıhı-mádenı ortalyǵyn aralaýmen aıaqtaldy.
