Reseılik úzdik kıno týyndylarǵa jyl saıyn beriletin aıtýly júldeni tabystaý rásimi byltyr pandemııaǵa baılanysty ótkizilmeı qalǵan edi. Bıyl sol olqylyqtyń ornyn toltyryp, reseılik kıno mamandar eki jyldyń qorytyndysyn qatar shyǵardy. Nátıjesinde, 2019 jyldyń qorytyndysy boıynsha rejısser Sergeı Dvorsevoıdyń «Aıka» fılmindegi jarqyn izdenisi úshin Samal Eslıamova úzdik aktrısa dep tanylyp, «Nıka» syılyǵymen qanjyǵa maılady.
– О́te qýanyshtymyn. Bul meniń ǵana emes, fılm túsirilimine atsalysqan barsha shyǵarmashylyq ujymnyń jeńisi dep bilemin. Alaıda ózim Máskeýde ótken marapattaý rásimine bara almadym. Syılyqty men úshin fılmniń ekinshi rejısseri, akter Vıacheslav Agashkın aldy. Slava bolmasa, bul fılm sál ózgeshe bolar ma edi?.. Ol júgirip júrip, túsirilim oryndaryn, ártisterdi de ózi tapqan óte eńbekqor adam. Osy sátti paıdalanyp men taǵy bir márte «Aıka» fılmindegi barlyq áriptesterime rahmet aıtqym keledi, – dedi aktrısa Samal Eslıamova aǵynan jarylyp.
Fılm jat elde zańsyz jaldamaly jumys isteıtin jandardyń qıyn da qaıshylyqty ómirin boıamasyz sýretteıdi. Jospardan tys júkti bolyp, jastyq albyrttyqpen sábıin perzenthanada tastap ketýge májbúr bolǵan, keıin qatesin túsinip balasyn izdeýge bel býǵan qyrǵyz qyzynyń basynan ótken qıyndyq pen taýqymetke toly psıhologııalyq kúıdi baıandaıtyn kartına óziniń taqyryp aýqymdylyǵy hám shynaıylyǵymen jalpy halyqtyq prokatqa shyqpaı turyp-aq, 2018 jyly Kann kınofestıvalinde úzdik atanyp, kıno álemin dúr silkintken bolatyn. Synshylardyń joǵary baǵasyna ıe bolyp, talaı baıqaýda úzdikter tuǵyrynan kórinip júrgen týyndynyń bul kezekti júldesi de sol tynymsyz eńbek pen mańdaı terdiń jemisi bolsa kerek.
– Akterge týa bitti talanttan bólek, minez de qajet. Samaldyń boıynda qolǵa alǵan isin sońyna jetkizbeı tynbaıtyn qaısar da ójet minez bar. Syrttaı óte názik kóringenimen, ishki qýaty myqty. Samal jarq-jurqty basty planǵa shyǵarǵan ıllıýstrator emes, shyn mánindegi sezimniń aktrısasy. Osy turǵydan kelgende biz jaqsy túsinistik. «Aıkanyń» kezekti jeńisi de sol izdenis pen tereńdiktiń nátıjesi ekeni sózsiz, – dedi fılm rejısseri Sergeı Dvorsevoı.
«Aıka» – rejısser Sergeı Dvorsevoıdyń 2018 jyly jaryq kórgen dramalyq fılmi. Kartına sol jyly 71-shi Kann kınofestıvaliniń basty baıqaý baǵdarlamasyna qatysyp, onda Samal «Úzdik aktrısa» atansa, ile Kotbýste (Germanııa) ótken 28-shi Halyqaralyq kınofestıvaldiń jáne Tokıo kınofestıvaliniń Gran-prıin ıelendi. Odan bólek Túrkııany da tánti etken týyndy, kezekti túrik kınofestıvalinde synshylar qaýymynyń iltıpatyna bólenip, «Úzdik aktrısa» atalymyndaǵy júldeni qazaq qyzynyń qanjyǵasyna baılap bergen bolatyn. Endi mine, Reseı kıno mamandarynyń da joǵary baǵasyn alyp, biraýyzdan qoldaýyna ıe bolǵan Samaldyń talanty «Nıka» syılyǵymen jáne bir márte moıyndalyp otyr.
Iá, eńbek pen izdenis bar jerde jeńistiń de qatar júrýi zańdy. Samaldyń talanty men ekrandaǵy shynaıy oıyny hám kıno keńistigindegi jemisti joly sonyń aıǵaǵy. Az ǵana ýaqyt ishinde tórtkúl dúnıe nazaryn ózine burǵyzyp, taqyryp aýqymdylyǵymen de, kórkemdik sapa deńgeıimen de talaıdy tánti etken fılmniń aldaǵy ýaqytta da baǵyndyrar belesi mol bolsyn demekpiz.
