HIH ǵasyrda qoldanylǵan myltyqty polısııaǵa Rıdder qalasynyń turǵyny alyp kelgen. Sot-ballıstıkalyq saraptama nátıjesi kórsetkendeı, bul qarý Týla qarý-jaraq zaýytynda shyǵarylypty. Sheber N.Kýrakovtyń 1889 jyly jasaǵan qos uńǵyly, shúrippeli qarýy – ańshy myltyǵy eken. Bir qyzyǵy, 130 jyl bolǵan myltyq eki uńǵydan da atýǵa jaramdy.
Qarýdy tapsyrǵan er adamnyń aıtýynsha, sırek kezdesetin myltyqty marqum anasynyń qoımasyndaǵy eski zattardy jınastyryp júrip taýyp alǵan. Krımınalıster aıtqandaı, ǵasyr ótse de myltyq báz-baıaǵy qalpynda. Bul qundy qarý úshin rıdderlik turǵynǵa komıssııa quramy 60 myń teńgeden astam qarjy tóleıdi.
Al Altaı aýdanynyń turǵyny polısııaǵa Ekinshi dúnıejúzilik soǵysy kezinde paıdalanylǵan tapanshany tapsyrǵan. Magazıninde úsh patrony da bar. Saraptama jumystary kórsetkendeı, bul qarý 1900 jyly jasalǵan. 7,65 mm kalıbrli, zaýyttyq nómiri «166710», ıaǵnı «Braýnıng» júıesine jatatyn oıyq atys qarý. Bir ereksheligi, ózdiginen oqtalady. Bul qarý da atýǵa jaramdy.
Aıta ketsek, tapansha Ekinshi dúnıejúzilik soǵysy kezinde AQSh pen Belgııa armııasynyń qolynda bolǵan eken. Aýdan turǵyny ony ardager atasynyń jertólesinen tapqan.
– Halyqtan zańsyz saqtalǵan atys qarýy men oq-dárilerdi satyp alý jónindegi komıssııa quramy er adamǵa qarý úshin
120 000 teńgeden astam qarajat tóleıdi. Osylaısha, úsh kún ishinde tirkelmegen qarý men oq-dárilerdi erikti túrde tapsyrý aksııasy kezinde halyqtan 7 mln teńgege 110 birlik qarý qabyldandy, – dedi Polısııa departamentiniń bastyǵy Saǵat Madıev.
Esterińizge sala ketsek, 20 sáýirden bastap oblys aýmaǵynda halyqtan atys qarýlaryn, oq-dárilerdi jáne jarylǵysh zattardy satyp alý boıynsha respýblıkalyq aksııa ótip jatyr.
Shyǵys Qazaqstan oblysy
