О́tken táýlikte taldama qorytyndysy 57 adamda oń nátıje kórsetip, ósim 0,7 paıyzdy quraǵan. Eń kóp jaǵdaı Taraz qalasynda, Qordaı jáne Baızaq aýdandarynda anyqtalǵan. Búginde oblys ortalyǵy «qyzyl» aımaqta. Al, Taraz shaharyndaǵy aptalyq ósim 304 naýqasqa jetip, 8,7 paıyzdy quraǵan. Qordaıda bul kórsetkish 6,2 paıyzǵa aınalyp otyr. Al, respýblıkalyq kórsetkish 5,6 paıyzdan aspaıdy. Oblystyq densaýlyq saqtaý basqarmasynyń basshysy Áset Qalıev 27 sáýirdegi jaǵdaı boıynsha ınfeksııalyq stasıonarda 897 adam em alyp jatqanyn, onyń 54-i jan saqtaý bóliminde ekenin jetkizdi. Medısınalyq mekemelerdiń materıaldyq-tehnıkalyq jabdyqtalýy men dári-dármektermen qamtylýy boıynsha eshqandaı másele joq eken.
Oblysta qazirgi kezde 37 egý pýnkti jumys isteýde. 36,7 myń jambyldyq vaksınanyń birinshi komponentin, 9,9 myń jambyldyq ekinshi komponentin qabyldaǵan. Moıynqum, Shý, Merki aýdandarynda jáne Taraz qalalyq №9 emhanada vaksınasııa álsiz júrgizilýde. Sáýir aıynyń sońyna deıin taǵy 49,9 myń adamǵa ekpe egilýi josparlanǵan.
Sonymen qatar oblys boıynsha sanıtarlyq-epıdemıologııalyq baqylaý departamentiniń basshysy Baıdildá Shynalıev qazirgi tańda qosymsha shekteýler engizý týraly qujat ázirlenip jatqanyn aıtty.
Onyń aıtýynsha, jańa sharalar bazarlardyń, oblysaralyq avtobýs qatynasy men basqa da segmentterdiń qyzmetine áser etedi. Osy oraıda, oblys ákiminiń orynbasary Almas Mádıev «Ashyq» jobasynyń álsiz iske asyrylyp jatqanyn atap ótti. Ol boıynsha Tarazdaǵy tek 39 kásiporyn ǵana jumys isteýde. Al, aýdandarda bul tájirıbe múldem taratylmaǵan.
«Tótenshe jaǵdaılar departamenti monıtorıngtik toptardyń jumysyna eshqandaı kómek kórsetip otyrǵan joq. Olarmen turaqty baılanysta bolý úshin departament bastyǵy shuǵyl máselelerdi sheshý boıynsha óz orynbasaryn bekitý qajet. Turǵyndar arasynda sanıtarlyq normalardy qatań saqtaý qajettigi týraly túsindirý jumystarynyń aýqymyn keńeıtý asa mańyzdy. Qoǵamdyq kólik pen bazarlarǵa aıryqsha nazar aýdarý kerek. Mektep oqýshylary men muǵalimder arasyndaǵy ınfeksııanyń taralýyn baqylaýdy nazarǵa alyńyzdar», dedi Berdibek Saparbaev.
Jambyl oblysy
