Sessııany qorytyndylaı kele Elbasy Qazaqstan halqy Assambleıasynyń tóraǵasy laýazymyn el isi basynda júrgen Prezıdent atqarýy tıistigin jetkizdi.
«Qazaqstan Respýblıkasynyń Tuńǵysh Prezıdenti – Elbasy týraly» Konstıtýsııalyq zańǵa, Assambleıa týraly zańǵa sáıkes maǵan Qazaqstan halqy Assambleıasynyń tóraǵasy laýazymyn ómir boıy atqarý quqyǵy berilgen. Jalpy, men sizdermen barlyq ýaqytta birge bolamyn ári odan bas ta tartpaımyn. Degenmen, Assambleıany basqarýǵa qatysty birqatar quziret elimizdiń Prezıdentine júktelgen. Tipti, bul da mańyzdy emes. Qazaqstan halqy Assambleıasy tirek retinde is basyndaǵy Prezıdenttiń janynda turýy tıis jáne ekinshi jaǵynan Memleket basshysy da Assambleıaǵa arqa súıeıdi. Sondyqtan men Assambleıany basqarý quqyǵymdy Prezıdent Qasym-Jomart Toqaevqa berý týraly sheshim qabyldadym», dedi Nursultan Nazarbaev.
Aıta keteıik, otyrysqa Memleket basshysy Qasym-Jomart Toqaev qatysyp otyr. Kún tártibi «Birliktiń, beıbitshilik pen kelisimniń 30 jyly» taqyrybyna arnalǵan.
Sessııa jumysyna onlaın formatta 550-den astam adam qatysyp otyr. Olardyń qatarynda barlyq óńirlerden kelgen Assambleıa músheleri, respýblıkalyq jáne óńirlik etnomádenı birlestikterdiń tóraǵalary, Parlament depýtattary, ortalyq atqarýshy organdardyń, saıası partııalardyń, dinı birlestikterdiń basshylary, ÚEU, ǵylymı, shyǵarmashylyq zııaly qaýym jáne BAQ ókilderi bar.
