«Asa qurmetti Elbasy Nursultan Ábishuly, bizdiń Assambleıanyń Qurmetti Tóraǵasy bolý týraly ortaq usynysymyzdy qabyl alýyńyzdy ótinemiz. Bul mártebe shyn máninde halyqtyń jáne memlekettiń aldyndaǵy tarıhı eńbegińizge baılanysty Sizge tıesili. Assambleıanyń barlyq músheleri bul usynysty qoldaıdy dep senemin», dedi Qasym-Jomart Toqaev.
Sonymen qatar Memleket basshysy qasterli táýelsizdigimizdiń 30 jyldyǵynda Assambleıa halyqtyń talap-tilekterin oryndaýǵa baǵyttalǵan naqty jobalardy júzege asyrýǵa aıryqsha mán berýi mindet ekendigin basa aıtty.
«Barshamyzǵa ortaq jumystyń basty baǵdary dál osyndaı bolýǵa tıis. Biz bárimiz birlik pen yntymaqtyń arqasynda jasampaz ult bolyp aldymyzda turǵan tarıhı maqsattarǵa qol jetkizemiz», dedi QR Prezıdenti.
Osy rette Tuńǵysh Prezıdenti Nursultan Nazarbaev Assambleıamen tyǵyz jumys isteı beretindigin atap ótti.
Eske sala keteıik, Elbasy Nursultan Nazarbaev Qazaqstan halqy Assambleıasynyń tóraǵalyǵynan ketti. Endi Qazaqstan halqy Assambleıasyn Memleket basshysy Qasym-Jomart Toqaev basqarady.
Aıta keteıik, otyrysqa Memleket basshysy Qasym-Jomart Toqaev qatysyp otyr. Kún tártibi «Birliktiń, beıbitshilik pen kelisimniń 30 jyly» taqyrybyna arnalǵan.
Sessııa jumysyna onlaın formatta 550-den astam adam qatysyp otyr. Olardyń qatarynda barlyq óńirlerden kelgen Assambleıa músheleri, respýblıkalyq jáne óńirlik etnomádenı birlestikterdiń tóraǵalary, Parlament depýtattary, ortalyq atqarýshy organdardyń, saıası partııalardyń, dinı birlestikterdiń basshylary, ÚEU, ǵylymı, shyǵarmashylyq zııaly qaýym jáne BAQ ókilderi bar.
