Qazaqstan Ulttyq Olımpıadalyq Komıtetiniń Bas assambleıasynyń kezekten tys otyrysy syrttaı ótti. Uıymnyń joǵary basqarý organy birqatar máselelerdi qarastyrdy.
Kún tártibindegi basty máselelerdiń biri - Qazaqstan UOK-tyń halyqaralyq yntymaqtastyq jónindegi vıse-prezıdentin saılaý boldy.
Jınalys músheleriniń biraýyzdan qoldaýymen Qazaqstan UOK Atqarý komıtetiniń qazirgi múshesi Úmit Shaıahmetovanyń kandıdatýrasy vıse-prezıdent laýazymyna 2024 jylǵa deıin qyzmet etý merzimimen bekitildi. Osylaısha, ol elimizdiń Olımpıadalyq komıtetiniń tuńǵysh áıel vıse-prezıdenti bolyp taǵaıyndaldy.
«Búgin Bas assambleıa Úmit Bolathanqyzy Shaıahmetovany jetekshi oryndardyń birine maquldap, óte mańyzdy sheshim qabyldady. Inklıýzııa, yntymaqtastyq, ártúrlilik jáne genderlik teńdik - Halyqaralyq Olımpıadalyq Qozǵalysty damytýdyń negizgi basymdyqtarynyń biri. Biz barlyq deńgeıdegi áıelderdiń sporttaǵy jetistikterin kótermeleýge jáne qoldaýǵa nıet bildiremiz jáne ulttyq federasııalardy osy baǵytta belsendi jumys isteýge shaqyramyz. Búgingi tańda olımpıadalyq sport túrleri boıynsha ulttyq quramalarymyzdaǵy áıel sportshylardyń sany 46% quraıdy. UOK ákimshiliginiń 59%-y áıelder, sonyń ishinde basym bóligi basshylyq laýazymdarda», dedi Qazaqstan Ulttyq Olımpıadalyq Komıtetiniń Prezıdenti Tımýr Qulybaev.
