Jer máselesi qoǵamda qyzý talqylanǵan kún tártibindegi ózekti problemalardyń biri. Sondyqtan Prezıdent Qasym-Jomart Toqaev halyq sózine qulaq asyp, atalǵan máseleni sheshýdiń naqty jolyn usyndy. Atap aıtqanda, Memleket basshysy óziniń zań shyǵarýǵa bastamashy bolý quqyǵyn paıdalanyp, aýylsharýashylyq maqsatyndaǵy jerlerdi sheteldikterge satýǵa jáne jalǵa berýge tyıym salatyn Zań jobasyn Parlamenttiń qaraýyna joldady.
Parlamenttiń eki Palatasy da bul qujat boıynsha aýqymdy jumys atqaryp, ony jan-jaqty qarady. Zań jobasyn talqylaýǵa jurtshylyq, sarapshylar jáne ǵalymdar da belsendi túrde qatysty.
Sonymen qatar osy zań jobasynda eger menshik ıesi bolyp tabylatyn tulǵanyń Qazaqstan azamattyǵy toqtatylǵan nemese Qazaqstan Respýblıkasynyń zańdy tulǵasyna sheteldikter múshe bolǵan jaǵdaıda aýyl sharýashylyǵy jerlerin ıelikten shyǵarý rásimi de qarastyrylǵan.
Búgin Senat atalǵan zań jobasyn qarap, qujattyń negizgi tujyrymyn maquldady. Alaıda, talqylaý barysynda oǵan ózgerister engizý qajettiligi týyndady. Soǵan baılanysty Palata otyrysynda zań jobasyn Májiliske qaıtarý týraly sheshim qabyldandy.
«Jer – halqymyzdyń eń basty qazynasy, qasterli táýelsizdigimizdiń belgisi. Sondyqtan jer máselesi qashanda strategııalyq mańyzǵa ıe. Osy zań jobasyna sáıkes, budan bylaı sheteldikterge, azamattyǵy joq adamdarǵa, sheteldik zańdy tulǵalarǵa, qandastarǵa aýylsharýashylyq maqsatyndaǵy jer ýchaskeleri satylmaıdy, ári jalǵa berilmeıdi. Jobada Qazaqstan Respýblıkasy zańdy tulǵasynyń múshesi nemese aksıoneri bolyp tabylatyn tulǵanyń Qazaqstan azamattyǵy toqtatylǵan jaǵdaıda aýyl sharýashylyǵy jerlerin ıelikten shyǵarý rásimi de qarastyrylǵan. Jalpy, bul zań jobasy, eń aldymen, halqymyzdyń jáne memleketimizdiń múddelerin qorǵaıdy», – dedi Senat Tóraǵasynyń orynbasary Nurlan Ábdirov.
Osy Zań qabyldanǵannan keıin de elimizde jer máselelerin zańnamalyq retteýdi jetildirý jumystary jalǵasa beredi. Taıaýda ǵana arnaıy qurylǵan Jer komıssııasy óz jumysyn aıaqtaǵany belgili. Onyń quramyna bes birdeı Senat depýtaty múshe bolǵanyn aıta ketken jón. Komıssııanyń otyrystary kezinde bul saladaǵy zańnamalardy jetildirýge qatysty kóptegen usynystar aıtyldy. Soǵan sáıkes, qazirgi tańda Úkimet jerdi paıdalanýǵa qatysty zańnamalyq túzetýler toptamasyn ázirleýde. Sonyń nátıjesinde aldaǵy ýaqytta tıisti zań jobasy Parlamentke kelip túsedi.
Sondaı-aq búgin senatorlar «Qazaqstan Respýblıkasynyń keıbir zańnamalyq aktilerine Qazaqstan Respýblıkasynda banktik, mıkroqarjylyq jáne kollektorlyq qyzmetti retteý máseleleri boıynsha ózgerister men tolyqtyrýlar engizý týraly» zań jobasyn qarap, qabyldady.
Memleket basshysynyń tapsyrmasy boıynsha ázirlengen bul qujat mıkroqarjylyq jáne kollektorlyq qyzmetti iske asyrýdyń quqyqtyq bazasyn jetildirýdi kózdeıdi. Endi osy zańǵa sáıkes kollektorlarǵa basqa adamdardyń telefon nómirlerinen qońyraý shalýǵa tyıym salynady jáne olar boryshkerlermen aradaǵy kez kelgen is-áreket kezinde vıdeo jáne aýdıofıksasııa júrgizýge mindetti bolady.
