Monografııalyq eńbektiń alǵashqy tusaýkeser rásimi elordadaǵy «Shańyraq» Qazaqstan halqy Assambleıasy kafedralarynyń qaýymdastyǵy men Pavlodar qalasyndaǵy S.Toraıǵyrov atyndaǵy ýnıversıtette ótken. Avtor óz eńbeginde ár kezderi ártúrli basylymdarda jaryq kórgen ǵylymı oı-pikirlerdi saralaı otyryp, qoǵamdyq kelisim men jalpyulttyq birliktiń qazaqstandyq modeliniń tujyrymdamalyq negizderin júıeleýge umtylys jasaıdy. Onyń aıtýynsha, monografııalyq oqý quraly stýdentterge, mektep oqýshylaryna, muǵalimder men jas ǵalymdarǵa, el tarıhy men qazirgi zamanǵy etnosaralyq qatynastar máselelerin zertteýshilerge arnalǵan. Valerıı Vıshnıchenko atalǵan eńbeginiń úlken bir taraýyn Qazaqstan halqy Assambleıasyna arnapty.
Avtordyń aıtýynsha, Qazaqstan halqy Assambleıasy bir orynda qatyp qalǵan qurylym emes, kerisinshe ýaqyt jyljyǵan saıyn damyp otyratyn tiri organızm ispettes uıym.
– Elbasy Nursultan Nazarbaev Assambleıanyń mıssııasy eshqashan tarylmaıtynyn, kerisinshe aldaǵy ýaqytta keńeıe túsip, mańyzdy qoǵamdyq kúshke aınalatynyn tilge tıek ete kelip, «jańa jaǵdaıda Assambleıa saıasattan tys naǵyz jalpyazamattyq jáne jalpyhalyqtyq ınstıtýtqa aınalýy tıis» degen bolatyn. Árıne, qoǵamda kórinis taýyp jatqan túrli jaǵdaı men jańa trendterdi eskere otyryp, Assambleıa da únemi qyzmet mazmunyn keńeıtip, jumys júrgizý ádisterin túrlendirip otyrýy shart. Eger naqty aıtatyn bolsaq, eń aldymen, áleýmettik ál-aýqatty arttyrýdyń ulttyq modelin qalyptastyrý barysynda Assambleıaǵa erekshe áleýmettik jaýapkershilik júktelip otyrǵanyn atap ótýge bolady. Birinshiden, bul qazirgi qoǵamnyń evolıýsııalyq damýyna alǵyshart bolatyn mańyzdy qural retinde moıyndalǵan Assambleıanyń medıasııalyq qyzmetine qatysty. Ekinshiden, QHA qoǵamdyq sanany jańǵyrtý úderisterine úles qosa alatyn jáne bul úderiske elimizdegi barlyq etnosty tarta alatyn úlken kúshke aınala bastady. Al, úshinshiden, XXI ǵasyrda Assambleıa azamattyq biregeılikti qalyptastyrýdyń jáne ony keıingi urpaqqa amanattaýdyń asa mańyzdy tetikteriniń biri bolyp qala beredi. QHA elimizdegi beıbitshilik pen kelisimdi qamtamasyz etý jáne bolashaǵy jarqyn jasampaz qoǵam qalyptastyrý baǵytynda bizdiń kóptegen etnosymyzdy toptastyrýdyń biregeı ınstıtýty bolyp qala beretinine senimdimin, – dedi monografııa avtory.
Jańa oqýlyq kópshiliktiń qyzyǵýshylyǵyn týǵyzyp otyr. Máselen, bul monografııany búginde elimizdiń joǵary oqý oryndarynda jumys istep jatqan Qazaqstan halqy Assambleıasy kafedralary paıdalanady. Al elimizdegi etnosaralyq birlik, tatýlyq máselesimen aınalysyp júrgen jas ǵalymdar nemese jaı ǵana qyzyǵýshylyq tanytqan qarapaıym oqyrman kitapty A. Baıtursynuly atyndaǵy Qostanaı óńirlik ýnıversıtetiniń «Rýhanı jańǵyrý jáne QHA» jobalyq ofısinen nemese L.Tolstoı atyndaǵy oblystyq kitaphanadan taba alady.
Qostanaı oblysy
