Táýelsizdik jetistikterin jyrlaǵan

Sýretshi kenebinde táýelsizdik je­tistikteri, qala men aýyl ómiri, týǵan ólke tabıǵaty, qazaq ólkesinen tabylǵan tańǵajaıyp jádigerler beınelengen. Atalǵan kórme «Qazaqstan Respýblıkasy Táýelsizdiginiń 30 jyldyǵy: ótkenge qarap bolashaqqa senimdi qadam basý» taqyrybymen órbigen respýblıkalyq dóńgelek ústel aıasynda tanystyryldy. Karantın talaptaryn saqtaý maqsatynda is-sharaǵa Ulttyq arhıv, Qaraǵandy oblysynyń jáne Nur-Cultan, Almaty qalasy memlekettik arhıviniń mamandary, ǵalymdar men tarıhshylar, magıstranttar onlaın-oflaın aralas formatynda qatysty. Jıyndy ashqan arhıv dırektory Baıan Jumataeva Táýelsizdiktiń 30 jyldyǵy bolashaqqa tyń serpinmen qadam basý úshin ótkenge taǵy bir márte orala oty­ryp, jetistikterimiz ben arman-maq­sat­tarymyzdy aıqyndaıtyn kezeń dep atap ótti.

«Táýelsizdik jyldarynda Qazaq­standa qoǵamnyń mádenı ómirinde, ta­rıhı sanany jańǵyrtý jolynda kóptegen eleýli is-sharalar atqaryldy. Ásirese tól tarıhymyzǵa qatysty rý­hanı muralarymyzdy jınastyrý men zerdeleýde otandyq arhıvter bir­talaı jetistikterge qol jetkizdi. Alys-ja­qyn sheteldik arhıvterden qazaq tarıhyna qatysty qujattardy elge ákelý jumystary «Arhıv – 2025» baǵ­darlamasy aıasynda áli de óz jalǵasyn tabýda. Qujattardy sıfrly formatqa kóshirý jumystary da kún tártibinen túsken joq. Shyǵarmashyl tulǵalar, sonyń ishinde qylqalam sheberleri táýelsizdik taqyrybyn tebirene jyrlady. Eldik rýhtyń únin jetkizetin týyndylar halyqtyq muraǵa aınaldy. Konferensııa barysynda tusaýy kesilip otyrǵan sýret kórmesi Jumadilhan Kerimbektiń shyǵarmashylyq áleminen ǵana emes, táýelsizdik ıgilikterinen de syr shertedi», deıdi Ortalyq memle­kettik ǵylymı-tehnıkalyq qujattama arhıviniń dırektory Baıan Jumataeva.

Dóńgelek ústel aıasynda shymyl­dyǵyn túrgen kórmege qatysýshylar respýblıkadaǵy arhıv isiniń jetis­tikteri, perspektıvalary men ózekti máseleleri, tarıhı sanany jańǵyrtý jolyndaǵy el arhıvteriniń róli týraly baıandamalar oqyp, oı-pikirlerin ortaǵa saldy. Is-shara aıasynda kópshilik nazaryna «Táýelsizdik – tuǵyrym» taqyrybynda arhıv qujattary negi­zinde daıyndalǵan beıneleý óner mu­ralary usynyldy.

ALMATY