Jas kezinde baýyrlaryn jetildiremin dep turmys qurmaǵan kelinshek keıinnen balaly bolýdy armandap, ózge ulttardyń 18 balasyn asyrap alǵan. Búginde úlken bes perzenti óz aldyna otaý qursa, kenje uly nebári eki jasta. Kásipker áıel osynshama balany baýyryna basam dep oılamaǵanyn aıtady.
Bastapqyda turmys qurmaı ýaqytymdy ótkizip aldym deıdi. 33 jasynda alǵash 4 kúndik tuńǵysh qyzyn asyrap alǵan. Keıinnen balalardyń sany jyl saıyn kóbeıip, kópbalaly ana atanypty. Úlken úsh qyzyn uzatyp, eki ulyn úılendirgen. Olardan tórt nemere súıip otyr.
«Táýekel dep osy joldy tańdadym. Qudaıǵa shúkir, baqyttymyn. At basyndaı altyn berse de, balalarymdy eshkimge aıyrbastamaımyn, eshkimge. Bárin birdeı kóremin. Balalalarymnyń ishinde ulty basqasy da bar. Qazaǵy bar, ózbegi bar, orysy bar, kárisi bar degendeı. Bári qazir qazaq, qazaqsha sóıleıdi», deıdi kópbalaly ana.
О́zi de kópbalaly otbasynda ósken ana bala baǵyp, tárbıeleýdiń ońaı emestigin jasyrmaıdy. Qınalǵan sátterimdi balalaryma kórsetpeýge tyrysamyn deıdi. Bastapqyda anasy kómektesse, qazir úlkenderi kishilerge qamqorshy. Biri sabaǵyn oqytsa, endi biri úıdiń jumysyna qolqanat. Máselen, Iаroslav esimdi ulynyń esimin Erasyl dep ózgertken. Qazir ol qazaq synybynda bilim alady, qazaqshaǵa sýdaı.
«Baýyrlarymnyń kóp bolǵany jaqsy eken. Aǵam aqyl aıtady. Ápkem durys joldy kórsetedi. Inilerimmen oınaımyz, qaryndastaryma kómektesemin», deıdi Erasyl Belıaev.
Jastaıynan kásipkerlikpen aınalysyp, tabandylyq, qajyrlylyqpen tabysqa qol jetkizgen ana perzentterin de eńbekke baýlyp júr. Uldaryna kólik jóndeý men dánekerleýdiń qyr-syryn úıretedi. Úıdegi qurylys jumystaryn da birlesip isteı beredi. Al qyzdary dúken men dámhananyń jumysyn júrgizýge kómektesedi. As úıdegi jumystardy da atqara beredi. Qolyndaǵy kelinine qolǵanat. Osylaısha jalǵyzbasty ana kóp ulttyń balasyn baýyryna basyp, úlken áýletke aınalyp otyr. Bastysy, balalar anasyn tapqanyna, anasy ul-qyzynyń amandyǵyna rıza.
