«Myń bala» olımpıadasynyń nátıjesinde Nursultan Nazarbaev qory ekinshi jyl qatarynan aýyl mektepterindegi eń qabiletti 5 jáne 6 synyp oqýshylaryn anyqtap keledi. Olımpıada jeńimpazdary elimizdiń daryndy balalarǵa arnalǵan jetekshi mektepterinde: Respýblıkalyq fızıka-matematıka mektebinde, «Bilim-Innovasııa» lıseılerinde, «Daryn» mamandandyrylǵan mektepterinde jáne Elbasy Akademııasynyń Virge oqý onlaın mektebinde oqýǵa múmkindik alady.
«Elimizde alǵash ret aýyl mektepteri úshin olımpıada onlaın formatta uıymdastyryldy. Testileý arnaıy ázirlengen platformada ótti. Biz elimizdiń kóptegen aýyldaryn qamtydyq, testileýge 100 myńǵa jýyq oqýshy qatysty. Testter keńistiktik jáne logıkalyq oılaý qabiletterin baǵalaýǵa baǵyttalǵan. Olımpıadanyń 5 myń fınalısi arasynda elimiz boıynsha ortasha ball 400 baldyń 343-in qurady. Bul aýyl oqýshylarynyń ǵylym, til jáne matematıkany oqyp-úırený úshin jetkilikti áleýeti bar ekenin kórsetedi», dedi «Elbasy akademııasy» korporatıvtik qorynyń basqarýshy dırektory Ánýar Janǵozın.
«Nursultan Nazarbaev qory aýyl jastarynyń damýyna erekshe kóńil bóledi jáne barlyq jaǵdaıdy jasap keledi. Mysaly, 2020 jyly bizdiń mekteptiń bir ǵana qatysýshysy fınalǵa ótip, Birge oqý onlaın mektebinde oqýǵa múmkindik aldy. Bıyl osyndaı 7 bala bar. Olardyń barlyǵy Nazarbaev zııatkerlik mektepteri men Respýblıkalyq fızıka-matematıka mektebiniń oqytýshylarynan qosymsha bilim ala alady. Biz óte qýanyshtymyz», dedi Úshqońyr orta mektep-gımnazııasynyń dırektory Gúlhan Amanjolova.
Olımpıada fınalısi, 6-synyp oqýshysy Arnur Muqashev olımpıada týraly muǵalimnen bilgen soń, qatysýǵa sheshim qabyldaǵanyn, mektepte jaqsy oqıtynyn jáne bolashaqta úlken jetistikterge jetkisi keletinin jetkizdi.
Eske salaıyq, olımpıada eki kezeńnen turady. I kezeń 2-10 sáýir aralyǵynda onlaın formatta ótti. О́ńirler boıynsha eń joǵary qorytyndy ball jınaǵan 5 myń oqýshy olımpıadanyń II kezeńine ótedi. II kezeńdi 2021 jylǵy 5 mamyrda barlyq sanıtarııalyq-epıdemıologııalyq talaptardy saqtaı otyryp, óńirlik testileý ortalyqtary bazasynda oflaın rejimde uıymdastyrý josparlanyp otyr. Fınalıster matematıkalyq saýattylyq, qazaq tilinde bilim alatyn oqýshylarǵa qazaq tili, orys tilinde bilim alatyn oqýshylarǵa orys tili, aǵylshyn tili jáne jaratylystaný ǵylymdary boıynsha akademııalyq bilimderin baǵalaý úshin kompıýterlik testileýden ótedi.
