Kóktemniń kókózek shaǵy. Dalanyń qary áli tolyq erip bitpegen. Eresek ulyn jetektep, úsh jasar qyzyn arqalaǵan jas áıel zorǵa júrip keledi. Álsin-álsin aıaldap, ashtyq ózegine túsken qos balapanyn ókpek jeldiń ótinen qorǵap, sonaý kóz ushynda buldyraǵan adyr tóbege qaraı umsyna aıańdaıdy.
О́ldim-taldym degende kúńgeı betiniń qary erip, baýyry qasqalanǵan adyr tóbege de tuıaq iliktirdi. Teristen soqqan yzǵar jataǵan tóbeniń eski seleýin japyra jyǵyp, shóp basyndaǵy bolymsyz dándi sypyra jınap buta-búrgenniń túbine úıgen eken, jas áıel qarmaýsyz qolyn sozyp seleýdiń kepken dánin jınady.
Qar sýymen erigen dánde qaıdan qunar bolsyn, qos qulynshaǵy shóptiń nilin jutyp, qarysýǵa shaq qalǵan jaq súıegin qozǵaǵandaı bolady. Jas áıel qos qulynyn baýyryna basyp uzaq otyrdy. Eńkildep jylaǵysy keldi, biraq kóziniń jasy sýalǵan eken, jylaı almady, jaı kemseńdedi.
Anasynyń baýyryna jabysqan jas qyz, janary móldirep, búıregi búlkildep, solyqtap otyrǵan anasyna bir qaraıdy, sonaý kóz ushynda munartqan saǵymǵa bir qaraıdy. Qý mekıen dala, jorǵalaǵan tiri jan, tatyp alar túıir dán joq, úsh muńlyqtyń ómiri qyl ústinde...
Kún jambasqa aýǵan soń jas áıel boıyna bar qýatyn jınap, buta-búrgenniń túbin timiskiledi. Túrtinektep júrip, dala tyshqanynyń inin taýyp aldy. Qudaıǵa shúkir! Jut – jeti aǵaıyndy degendeı, ashtyq bastalǵaly dalanyń órip júretin sur tyshqany da quryp ketkeli qashan. Álde qyrǵıdaı tıgen ashtardan qorqyp bir jaqqa aýyp ketti me eken...
Jas áıel jalma-jan tyshqannyń inin qazdy. Qar sýy sińgen jer qyrtysy jumsaq eken, qara topyraq opyrylyp tez qazyldy. Inniń túbi kórindi. Oı, Alla, jıegin uıalap, ortasyn shuńqyrlaǵan jumsaq sary shóptiń ishinde kózin áli ashpaǵan qyzyl shaqa tyshqannyń tórt balasy shıqyldap jatyr. Sál arǵy jaǵynda bir ýys bıdaı úıilip tur.
Bıdaıdy kórgen jas áıeldiń úmit oty oıanǵandaı boldy. Osy bir ýys bıdaıdy talǵajaý etip, ashtan ólmeı el shetine ilinip ketýge bolatyn shyǵar. Bıdaıdy shashaý shyǵarmaı jınap almaqqa qolyn sozǵany sol edi, shaqalaq tyshqandar shıqyldap shyrylǵa basty.
Jas áıel qolyn tartyp aldy. Eger myna bıdaıdy jınap alar bolsa, sóz joq myna tyshqannyń balalary ashtan óledi, almasa óziniń balalary ashtan óledi. Júregi ezilip uzaq otyrdy. Sodan Allaǵa táýekel etti. Ashtyqtyń ne ekenin mine bir kisideı kórip keledi, bıdaıyn tartyp alyp baıqus tyshqandardy ashtan óltirse, joly bolmaq pa?! Álde sabyr saqtap, Alladan úmit etken durys pa?!
Jas ana bıdaıǵa qol tıgizbedi. Bul shaqalaqtardyń anasy bar ǵoı, ol balalaryn ashtan óltirmeý úshin qınalyp júrip myna bıdaıdy jınaǵan shyǵar...
Beıbaq áıel eki balasyn jetelep ornynan turdy. Qarańǵylyq túspeı turǵanda anaý bir saǵymdanǵan bókterdiń jıegine jetip almaqqa bekindi. Sóıtip, tóbeden tústi. Júrip keledi. Eki balasy «anamyz bir ýys bıdaıdy nege almady» degendeı artqy jaqqa jaltaq-jaltaq qaraıdy. Jas áıel qos qulynshaǵynyń janaryna qaraı almady, qarasa «bizdi ashtan óltirmeksiń be?» degen únsiz janaıqaıdy kórer edi.
Jas ana «Allaǵa táýekel ettim emes pe, bizdi yrzyqtandyrýy kerek» degen nyq senimnen basqa túgi de joq aıańdap kele jatty. Bir zamanda zý etken qanat dybysy estildi. Qarasa, bir qý túlek búrkit, eliktiń shybyshyn qýyp júr. Elik bularǵa qaraı qashyp keledi. Dál aldaryna qashyp kelgen elikti búrkit shúıilip kelip búrip tústi de, tyrp etkizbeı basyp qaldy.
Anasy balalaryna qosylyp shýlap qoıa berip edi, úrikken búrkit elikti tastady da, kókke kóterilip ketti. Allanyń rahymyn kórmeısiz be, shalajansar elikti úsh muńlyq baýyzdap aldy. Ot jaǵyp etin qaqtap jedi. Qalǵan etin múshelep, arqalap aldy da jolǵa shyqty.
El shetine ilindi. Bes shalqardyń boıyna qos tigip, balyq aýlap kún kórip jatqan adamdarǵa qosyldy. Qarǵa tamyrly qazaq emes pe, jas áıeldiń naǵashylary sol jerden tabylyp, olar qamqorlyǵyna aldy.
Arada jyljyp jyldar ótti, jas áıeldiń uly medısına ǵylymdarynyń doktory boldy, qaryndasy Máskeýde oqyp bitirip, uzaq jyl standarttaý salasynda eńbek etti. Bulardyń boıynda basqa adamdarda joq aıryqsha bir qasıet bar edi. Bul analarynan qalǵan ósıet: «Adam balasyna qaıyrymdy bolý». О́ıtkeni bular alapat ashtyqtan bir Allanyń qalaýymen tiri qalǵan jandar bolatyn.
