Sonaý 1909 jyldan beri uıymdastyrylyp kele jatqan dúbirli doda bıyl 104-márte ótkiziledi. Italııa tas joldaryndaǵy dástúrli jarysta qazaqstandyq komanda jyl saıynǵy básekede táýir óner kórsetip júr. Tipti «Astananyń» eki veloshabandozy úsh ret jarys jeńimpazy atanǵan. Atap aıtsaq, 2008 jyly ıspanııalyq Alberto Kontador bir ret jáne 2013, 2016 jyldary ıtalııalyq Vınchenso Nıbalı eki márte osy jarystyń bas júldesin oljalap, «Astananyń» abyroıyn asqaqtatqan edi. Sonymen qatar jekelegen kezeńderde basqa da veloshabandozdarymyz tuǵyrdyń bıik satysynan kórindi.
Astana-Premier Tech veloklýbyn Apennın túbegine bıylǵy «Parıj – Nıssa» jarysynda ekinshi jáne «Alpi týrynda» úshinshi oryn alǵan reseılik Aleksandr Vlasov bastap barady. Sonymen qatar «Djıro d’Italııaǵa» Ispanııa chempıony Lýıs Leon Sanches pen Gorka Isagırre, ıtalııalyq veloshabandoz Samýele Battıstella, Fabıo Fellıne, Matteo Sobrero, kolýmbııalyq Harold Tehada jáne qazaqstandyq sportshy Vadım Pronskıı qatysady.
«Aleksandr Vlasov – bizdiń «Djıro d’Italııa» jarysyndaǵy kóshbasshymyz jáne ol osy dodanyń jalpy esebinde joǵary orynǵa ıe bolý úshin baryn salady. Oǵan komanda ókilderi barynsha qoldaý kórsetedi dep senemiz. Biz «Alpi týrynda» Vlasovtyń baby jaqsaryp kele jatqanyn baıqadyq. Sondyqtan ol «Djıro» favorıtteriniń biri bola alatynyna senimdimin. Vlasov Italııada top jarý úshin qolynan kelgenniń bárin jasaıdy. Sonymen qatar bizdiń quramda belgili bir kezeńderde synǵa túsetin myqty jáne tájirıbeli shabandozdar da bar. Men, eń aldymen, Lýıs Leon Sanches pen Gorka Isagırrany aıtqym keledi. Bul eki ıspanııalyq veloshabandoz grand-týrlarda qalaı jeńiske jetý kerektigin jaqsy biledi. Ekeýi de qazir naǵyz babynda jáne komandany alǵa jeteleýge tolyq daıyn. Deı turǵanmen, osy dodaǵa qatysyp jatqan bizdiń kez kelgen sportshymyz barlyq kezeńde jeńiske jetý úshin kúrese alatynyn bilemin. Fabıo Fellıne men Samýele Batıstella shaǵyn pelotonnan sprınttik jarysqa qatysa alady. Matteo Sobrero ýaqytqa arnalǵan jekelegen jarystarda óziniń qandaı dárejede ekenin kórsetti. Sondyqtan bizdiń sportshylar Týrınnen jarysty sátti bastaıdy dep oılaımyn», dedi Astana-Premier Tech komandanyń sport dırektory Djýzeppe Martınellı.
Aıta keteıik, bıylǵy «Djıro d’Italııa» velokópkúndigine 23 komandanyń 148 veloshabandozy qatysady dep josparlanýda. Al 21 týrǵa sozylatyn jarysta sportshylar Týrın men Mılanǵa deıin 3479,9 shaqyrym joldy júrip ótedi.
