Balabaqsha kezegin ádil bóletin bir ońtaıly júıe osy salaǵa buıyrmaı-aq qoıdy. Basynda balabaqsha kezegi qolma-qol joldama berý júıesinen elektrondy formatqa aýysqanda tap bir osy saladan jemqorlyq túp-tamyrymen joıylyp ketetindeı qýanǵan edik. Balabaqsha kezegi eGov.kz portalyna engizilgen sátte bılik «kezek ata-analardyń kóz aldynda ótedi, ashyq ta ádil bolady» dep sendirgeni de shyn. Kóp uzamaı bilim basqarmalary elektrondy úkimette áp-ádemi qalyptasqan kezekti jeke kompanııalardyń enshisine bere bastady.
Osylaısha, astanalyq baldyrǵandarǵa oryn úlestirý eGov.kz-ten e-astana.kz júıesine ótip, odan keıin indigo24.kz platformasyna berildi. Balabaqsha kezegine baılanysty daý osy jerde bastaldy. Eń qyzyǵy, búginge deıin alǵa jyljyp kelgen kezek keri kete bastady. Ań-tań bolǵan ata-analar shý kóterip, aryz-armanyn áleýmettik jelige de jazyp jatty.
Bul jaǵdaı óz basymyzdan da ótti. 2018 jyly dúnıege kelgen ulymdy týa sala kezekke qoıyp, balabaqshaǵa 4948-inshi bolyp tirkelgen edik. Birer jyldan keıin teksersek, kezegimizdi keri jiberip, 5587-shi orynǵa aparyp tastapty. Eki jyldan keıin tipti 6204-inshi orynda júrmiz. Kúni keshe qarasam, áıteýir 4910 orynda tur ekenbiz. Biraq 25 mamyrdan keıin balabaqsha kezegi qaıtadan jańarady. Sonda «taz keıpimizge» túsip, jurttyń sońynda turmasaq bolǵany.
Balabaqsha kezeginiń alǵa emes, keri ketýine ne sebep? Bir gáptiń bary anyq. Bul másele talaı kóterilip júr. Bilim basqarmasy mamandarynyń da jaýabyn jattap alǵanbyz. Olardyń aıtýynsha, «kópbalaly otbasylar, áskerıler sekildi jeńildigi bar azamattardyń balalary balabaqshaǵa birinshi iligedi, olarǵa basymdyq beriledi». Álbette, jeńildigi bar tulǵalarǵa kezekten tys oryn bólgenine eshkimniń talasy joq. Biraq balabaqshany kezeksiz alatyn mundaı azamattar buryn da boldy ǵoı? Ol kezde nege kezek keri ketpegen?! Osydan-aq júıe jańarǵanymen, jumys jaqsarmaǵanyn baıqaýǵa bolady. Budan góri «balabaqsha kezegine kim buryn tirkeledi, sonyń kezegi buryn keledi» degen eski qaǵıdat áldeqaıda ádilirek edi. Ol kezde kezegińniń keri ketip jatqanyna shaǵymdanýǵa bolatyn edi. Halyqqa qyzmet kórsetý ortalyǵyna baryp, dáleldeıtin anyqtamany nemese kezektiń skrınshotyn kórsetseńiz nemese bilim basqarmasyna kelip, máseleniń anyq-qanyǵyn bilýge bolatyn. Al qazirgi elektrondy platformada bul múmkin emes. Kezegińniń keri ketýi munda qalypty qubylys. Eshkimge de, eshteńe de dáleldeı almaısyń.
Jurtshylyq senip júrgen indigo24.kz júıesinde qısynsyz jaıttar kóp. Mysaly, balabaqshadan bosaǵan oryndy elden buryn alyp qalý úshin óziń de, ınternetiń de jyldam bolýy kerek. Ári tańmen talasa turyp, tańǵy saǵat 7.00-ge 10 mınýt qalǵanda júıege kirip, serverdegi saǵat etalonyn kirpik qaqpaı kúzetip otyrýyń kerek. Saǵat týra 7.00 bolǵanda bosaǵan balabaqsha oryndaryna joldama alý júıesi ashylady. Osy sátte shalt qımyldap, indigo24.kz portalyndaǵy jeke kabınetke kirip, «joldama alý» batyrmasyn basyp úlgerý kerek. Eger ǵaıyptan batyrmany basý baqyty buıyryp qalsa (óıtkeni dál kerek kezde bul batyrma nege ekeni belgisiz basylmaı qalady), balabaqsha nómirin, ondaǵy topty kórsetip, joldama alý prosedýralaryn 10 mınýtta jyldam aıaqtaý kerek. Osy ýaqyttyń ishinde úlgermeseńiz, balabaqsha oryny qolyńyzdan sýsyp túsip, basqaǵa ketedi. Portaldyń arqasynda ata-analar ábden haker bolatyn túri bar.
Indıgo elektrondy balabaqshasy júıesin áli de jetildirý kerek. El túsinbeı júrgen jaıttar kóp. Ásirese aqparattyq-túsindirý jaǵy kemshin. Júıege kire qalsańyz, «balanyń tabysty joly osy jerden bastalady» degen ádemi sóz jazylyp tur. Biraq júıeniń ózi osyǵan saı bola almaı turǵany ókinishti. Sondyqtan bilim basqarmalary kezektiń nege keri ketetinin, buryn tirkelgen balalardyń aldyna naqty kimder, qandaı negizde olardyń aldyn orap ketkenin ashyq túrde kórsetip, túsindirýi qajet dep sanaımyz.
