«Elimizde vaksınalaý osy jyldyń aqpanynda bastaldy. Búginde 2,3 mln doza vaksınaǵa qoljetimdilik qamtamasyz etilgen. 1 sáýirden bastap vaksınalaý qarqynyn 12 esege arttyryp, ıaǵnı táýligine 11 myńnan 135 myńǵa jetkizip otyrmyz. Qazirgi ýaqytta bizde úsh vaksına bar jáne azamattarǵa tańdaý múmkindigi berilip otyr. Olar – Spýtnık-V, QazVac jáne Hayat-Vah. Vaksınalar Qazaqstannyń barlyq óńirinde qoljetimdi», dedi A.Soı.
Mınıstrdiń sózinshe, búginge deıin 1 507 389 azamat vaksınanyń I-komponentin, 422 279 adam II-komponentin aldy. Sonymen qatar ol elimizdiń barlyq medısınalyq uıymyn qajetti temperatýra rejimimen qamtamasyz etý, muzdatqysh jabdyqtaryn satyp alý boıynsha aýqymdy jumys júrgizilgenin atap ótti.
«Eń mańyzdysy mobıldi ekpe jasaý brıgadasy oqytyldy. Qazir shamamen 11 myń medısına qyzmetkeri vaksınalaý prosesin qamtamasyz etýde. Elimizde 1,4 myń egý pýnkti quryldy. Onyń ishinde 400-i – kóshpeli pýnkt. Olar eńbek ujymdaryna, saýda úılerine, iri saýda ortalyqtaryna baryp ekpe jasaıdy. Sondyqtan vaksınalaý barysy qarqyndy júrgizilip jatyr dep aıta alamyz. El turǵyndarynyń vaksınaǵa degen senimi de artyp keledi», dedi A.Soı.
Sonymen qatar vedomstvo basshysy elimizde koronavırýs vaksınasyn alǵan azamattardyń 0,02 paıyzy ǵana vırýsty qaıta juqtyryp alǵanyn alǵa tartty.
«Jalpy alǵanda vaksınalaý prosesiniń búginde óte belsendi júrip jatqanyn kórip otyrmyz. Azamattarymyz vaksınaǵa úlken senim arta bastady. Vaksına alǵan azamattardyń ishinde tek shamamen 0,02 paıyzy ǵana aýyryp qaldy», dedi mınıstr.
Onyń paıymdaýynsha, mundaı kórsetkish vaksınanyń tıimdi ekenin kórsetedi. «Ol aıqyn kórinip tur. Árıne, vaksınalaýdyń munan arǵy qarqyny densaýlyq saqtaý júıesiniń úılesimdi jumysyna, sonymen qatar azamattardyń túsinigine, jaqyndary úshin durys tańdaý jasaýyna jáne ujymdyq ımmýnıtettiń damýyna baılanysty ekenin atap ótkim keledi», dedi A.Soı.
Koronavırýstan qaıtys bolǵan adamdy jýyndyrý rásimine týǵan-týystarynan eki adam ǵana qatysa alady. Bul týraly Densaýlyq saqtaý vıse-mınıstri Ajar Ǵınaıat aıtty.
«Búginde jerleý rásimi respýblıkanyń Bas memlekettik sanıtar dárigeriniń qaýlysyna sáıkes rettelip, júrgiziledi. Koronavırýs ınfeksııasynan qaıtys bolǵan adamnyń máıiti arnaıy orynda, ıaǵnı patalogoanatomııalyq morgtarda, bólimshelerde jýyndyrylýy kerek. Osy jýyndyrý rásimine týǵan-týystarynan eki adam qatysa alady. Týystary kirgizbes buryn qorǵanysh kıimdermen, quraldarmen qamtamasyz etiledi. Máıit jýyndyrylǵannan keıin jerleý úshin týǵan-týystaryna beriledi», dedi vıse-mınıstr.
Onyń aıtýynsha, janaza rásimine marqumnyń tek týǵan-týystary qatysyp, araqashyqty saqtaýy, maska taǵýy qajet. «Qazirgi ýaqytta jýyndyrylyp berilgen máıitti dinı qyzmetshilerge nemese týǵan-týystaryna ustaýǵa bolmaıdy. Barlyq máıit jalpy zıratqa jerlenip jatyr. Búgingi jerleý ádisi osyndaı», dedi Ajar Ǵınaıat.
