Brıfıngte qoǵamdyq qaýipsizdikti qamtamasyz etý baǵytynda qalalyq polısııa basqarmasynyń 2021 jyldyń 4 aıynda atqarǵan jumystary, alaıaqtyq deregimen tirkelgen qylmystar jaıly baıandaldy.
Qala kóleminde qylmystardyń tirkelýi 1112 –den 974-ke (12,4 paıyzǵa) tómendegen. Degenmen, alaıaqtyq qylmystyń tirkelý kórsetkishi 71,4 paıyzǵa joǵarylaǵan.
Jyl basynan bastap 329 alaıaqtyq qylmysy tirkelse, onyń ishinde, áleýmettik jeli arqyly jasalǵan alaıaqtyq (aqsha tabý, nesıe alyp berý, aqshany 2 ese kóbeıtý) 77-den 220-ǵa deıin joǵarylaǵan.
Brıfıng barysynda alaıaqtyq qylmysynyń ósim alýynyń basty sebepterine toqtalǵan Sáken Abıbýllauly alaıaqtyq qylmystar ishinde áleýmettik jeli arqyly kóp paıda tabý nemese azamattardyń syrtynan onlaın nesıe alý bolyp otyrǵanyn, nesıe berip otyrǵan mekemelerdiń barlyǵy Almaty qalasynda ornalasqan «Kredıt24», «Onlaın Fınans», «Zaımer», «Vygodnyı kredıt» taǵy sol sııaqty jaýapkershiligi shekteýli seriktestikteri ekendigin aıtyp ótti.
Basqarma tarapynan atalǵan seriktestikter tarapynan nesıe rásimdeý barysynda birshama kemshilikterge jol bergeni anyqtalyp, ony joıýǵa jáne olardyń qyzmetine ýaqytsha shekteý qoıýǵa Almaty qalasynyń ádilet departamentine, seriktestikter basshylaryna qylmystyq-prosestik kodeksiniń 200-babynyń talabyna saı usynys joldanǵan.
Aldaǵy ýaqytta alaıaqtyqpen isti bolyp sottan ótkenderdiń foto sýretterin saýda oryndary men halyq kóp shoǵyrlanatyn jerlerge jáne qoǵamdyq kólikterge ilý josparlanǵan.
