23 sáýirde, túngi saǵat 00.50 shamasynda Semeı qalasynan shyǵa beriste patrýldik polısııa qyzmetkerleri «Mersedes-Bens» markaly avtokóligin toqtatqan. Belgili bolǵandaı, elordalyq júrgizýshi mas kúıde bolǵan. Sonymen qatar ol 3 jylǵa deıin kólik quralyn basqarý quqyǵynan aıyrylǵan eken.
«Atalǵan fakti boıynsha QR QK-niń 346-baby 1-bóligi, ıaǵnı kólik quralyn basqarý quqyǵynan aıyrylǵan jáne masań kúıdegi tulǵanyń kólik quralyn basqarýy boıynsha sotqa deıingi tergeý bastaldy. Qazirgi ýaqytta bir qatar sot saraptamalary taǵaıyndaldy. Onyń nátıjesi boıynsha prosestik sheshim qabyldanady», dedi oblystyq PD bastyǵy Saǵat Mádıev.
Sonymen qatar zańda bul fakti boıynsha ómir boıyna kólik quralyn basqarý quqyǵynan aıyryp, 5 jylǵa deıin bas bostandyǵynan aıyrylý kózdelgen.
Bıyl Polısııa departamentiniń aýmaqtyq bólimshelerinde sotqa deıingi is júrgizý aıasynda kólik quralyn basqarý quqyǵynan aıyrylǵan jáne masań kúıdegi tulǵanyń kólik quralyn basqarýynyń 33 faktisi tirkelgen. 24 fakti boıynsha aıyptaý úkimi shyǵarylǵan.
