Al elimizge Kaspıı teńiziniń eń uzyn teńiz jaǵalaýy tıesili. Osy erekshe mánge ıe aýmaqty jat kózden, aram nıettilerden qorǵaý, beriktigimizge qol suqtyrmaý, sol arqyly áskerı teńiz kúshteriniń aıbynyn asyrý – mine, bizdiń basty maqsatymyz osy. Qazirgi ýaqytta osy áskerı bólimde jas sarbazdardy áskerı iske, otansúıgishtikke baýlyp, áskerı tehnıka men qarý-jaraqty qoldanýdy úıretip kelemin.
Men – táýelsizdiktiń qurdasymyn. Sondyqtan da bolar, bala kezimnen Halyq Qaharmany, armııa generaly Saǵadat Nurmaǵambetovtiń qaharmandyǵy men qaıratkerligin ózime úlgi tutyp erjettim. Batys Qazaqstan oblysynyń Jalpaqtal aýylynda týyp-óstim. Ata-anamnyń senim artqan súıenishteri, artymnan ergen qos qaryndasymnyń arqa tutar aǵasy, jan jarym men qyzymnyń qorǵanymyn. Al áskerı ómirde el qorǵany bolar jas sarbazdarǵa, jan-jaǵyma sózimmen de, isimmen de úlgi bolar naǵyz komandır ataný – basty mindetim. Sebebi komandır bolý – úlken jaýapkershilik. Sapqa endi qosylǵan sarbazǵa jón siltep, jol bastaý úshin de boıyńda tegeýrin bolýy kerek.
Egemen eldiń jaýyngeri bolý – ata-babamyzdyń aq naızanyń ushymen, aq bilektiń kúshimen saqtap, urpaǵyna amanat etken ulan-ǵaıyr jerimizdiń, kıeli táýelsizdigimizdiń qorǵany bolý degen sóz. Al bizdiń enshimizge osy asyl murany kózimizdiń qarashyǵyndaı saqtaý, damytý men nyǵaıtýdyń úlken jaýapkershiligi buıyrdy. Ol úshin qatarǵa turyp, sap qurǵan, el-jurtynyń aldynda Otanǵa adal qyzmet etýge ant bergen árbir sarbaz óz eliniń naǵyz patrıoty bolýy kerek. Árqashan izdenip, bilimińdi tolyqtyrý, óz-ózińdi damytyp, qandaı salada qyzmet etseń de óz qataryńnyń úzdigi bolýǵa tyrysý qajet. Qazir bizge keregi qara basyńnyń emes, qalyń elińniń qamyn oılaý, jurtyńa judyryqtaı bolsa da paıda alyp kelý bolyp tur.
El táýelsizdiginiń 30 jylynda Qazaqstan áskeriniń áleýeti aıtarlyqtaı ósti. Qazaqstan armııasynyń aıbyny asqaqtap, abyroıy jyldan-jylǵa artyp keledi.
Endigi tilek – elimizdiń tynyshtyǵy men jurtymyzdyń amandyǵy ǵana. Dúnıe júzin dúrliktirgen myna indetten aman-esen shyǵyp, burynǵy mamyrajaı qalypty ómirimizge tezirek oralaıyq dep tileımin. Qazaq eliniń kók aspanyn bult torlamasyn!
Qýanyshbek JAMANǴARIN,
29011-áskerı bólimi shtab batalony komendanttyq rotasynyń komandıri
