Tatarstanǵa Qazaqstannan 18 balýan attansa, solardyń jeteýi alǵashqy kúni tatamıge shyqty.
Jarystyń alǵashqy kúni qorjynymyzǵa eki qola medal tústi. Onyń ıegerleri – Dáýren Súıeýkenov pen Eset Qýanov. Asa jeńil salmaqta beldesken Dáýren ızraıldik Matan Kokloev, brazılııalyq Erık Takabatake, reseılik Aıýb Blıevti utqanymen, jartylaı fınalda Reseıdiń taǵy bir ókili, álem chempıonatynyń kúmis júldegeri, eki dúrkin Eýropa chempıony Robert Mshvıdobadzege ese jiberdi. Qola medal úshin tartysta qandasymyz chehııalyq Davıd Pýlkrabekke tize búktirdi. 66 kılo salmaqta kúsh synasqan Eset qyrǵyzstandyq Artýr Te, tájikstandyq Alıjon Safaralıev, reseılik Iаkýb Shamılovqa shań qaptyrǵanymen, sheshishi tusta Qap taýynyń qyrany Abdýla Abdýljalılovqa jol berdi. Úshinshi oryn úshin básekede qazaq dzıýdoshysy grýzııalyq Bagratı Nınashvılıden aılasyn asyrdy.
О́kinishke qaraı, Baýyrjan Narbaev (60 kılo), Erlan Serikjanov (66 kılo), Aqmaral Naýatbek (48 kılo), Abıba Ábýjaqynova (48 kılo) jáne Sevara Nıshanbaeva (57 kılo) alǵashqy aınalymdarda súrindi.
