Jylyoı aýdandyq ákimdiginiń málimetinshe, «NGSK Kazstroıservıs» AQ Atyraý fılıalynyń 500-ge jýyq jumysshysy eńbekaqy tóleý júıesin ózgertýdi qalap otyr. Jumysshylar jumysyn toqtatyp, birneshe talap qoıǵan.
«Oqıǵa ornyna Jylyoı aýdandyq ákimdigi men quqyq qorǵaý organdarynyń ókilderi keldi. Kelissózder kezinde jumysshylar eńbekaqy tóleý júıesin ózgertý, turmystyq jaǵdaıdy jaqsartý sekildi birqatar talaptar qoıdy», delingen aýdandyq ákimdiktiń aqparatynda.
Kelissóz qorytyndysynda kompanııa qyzmetkerleri ákimdik ókilderine, Atyraý oblystyq memlekettik eńbek ınspeksııasy basshysynyń atyna 500-ge jýyq adam qol qoıǵan ujymdyq shaǵym bergen. Jumysshylar kótergen másele kompanııa basshylyǵynyń, «Teńizshevroıldyń», «Senimdi Qurylys» JShS men memlekettik organdardyń baqylaýyna alyndy.
Al, «NGSK Kazstroıservıs» AQ Atyraý fılıalynyń bas dırektory Sábıt Janasov jumysshylardyń narazylyǵyn týdyrǵan máselelerdi oń sheshý úshin Atyraýǵa keletinin jáne jumysshylardy eshkim qýdalamaıtynyna, olardy jumystan shyǵarmaıtynyna ýáde berip otyr.
Bul kompanııa qyzmetkerleri aýysymdyq ádispen jumys isteıdi. Olardyń ortasha eńbekaqysy 200 myńnan 300 myń teńgege deıingi aralyqty quraıdy. Kompanııanyń málimetinshe, jumysshylardyń jalaqysyn kóterý (5,4%) máselesi bıylǵy qańtarda qolǵa alynǵan.
