Oq pen ottyń ortasynda júrip Otandy qorǵaǵan jaýyngerler erliktiń teńdessiz úlgisin kórsete bildi. Eren erligi úshin sol kezde 20 jambyldyq jaýyngerge Keńes Odaǵynyń Batyry ataǵy berilgen eken. Birqatar azamattar joǵary dárejeli «Aleksandr Nevskıı» ordenimen de marapattalǵan. Nevskıı ordenin alǵandardyń ishinde jerlesimiz Rahymberdi Dosmuhambetov te bar edi.
Rahymberdi Dosmuhambetov 1920 jyly Jambyl oblysy, sol kezdegi Aqjar, qazirgi Jasórken aýylynda dúnıege kelgen. Ol 19 jasynda Qyzyl ásker qataryna shaqyrylyp, 1940-1944 jyldary urys dalasynda bolǵan. Jas jaýynger sol kezeńde erekshe erligimen kózge túsip, bútin bir batalondy basqaryp, aǵa leıtenant áskerı shenin ıelengen eken. Keıinnen 28-Nevel atqyshtar dıvızııasy 88-polkiniń atqyshtar rotasynyń komandıri bolyp qyzmet atqarǵan. Rahymberdi Dosmuhambetov Pahomovo derevnıasy úshin nemis basqynshylarymen bolǵan shaıqasta 7 jaýyngerimen birge shabýylǵa birinshi bolyp kirip, 9 jaýdy jaıratqan. Maıdan dalasynda jaralanǵanyna qaramastan, urysty jalǵastyrǵan. О́ziniń jaǵdaıy aýyr bolsa da jaralanǵan kapıtan Moıseevti shaıqas alańynan arqalap alyp shyǵyp, jaýyngerlik mindetine adaldyq tanytqanyn áýlıeatalyq ardagerler aıtyp keledi. Atalǵan erligi úshin Rahymberdi Dosmuhambetovke 1944 jyly 6 aqpan kúni «Aleksandr Nevskıı» ordeni berilipti. Alaıda, aýyr jaralanǵan komandır alty aı boıy gospıtalde jatyp, marapattary men qujattaryn joǵaltyp alǵan eken.
Odan beri jetpis jyldan astam ýaqyt ótti. Bul kúnde sol bir surapyl kúnderdiń tiri kýágerleriniń, shynaıy shejireshileriniń qatary azaıyp barady. Dese de, erlik eshqashan umytylmaıdy. Jan alysyp, jan berisken qandy joryqtarda árbir jaýyngerdiń kórsetken erligi búgingi urpaqqa úlgi. Erliktiń máńgi ólmeıtini, esten shyqpaıtyny aqıqat. Uly Jeńis kúni qarsańynda Jambyl jurtshylyǵyna jyly habar jetti. Osydan 77 jyl buryn jaýynger Rahymberdi Dosmuhambetovtiń gospıtalde jatqan kezinde joǵaltyp alǵan marapattary elge oraldy. Taǵdyrly marapat araǵa jyldar salyp óz ıesin tapty. Bul marapat jarty ǵasyr boıy Rýmynııa memleketiniń astanasy Býharest murajaıynda saqtalǵan eken. Muraǵattyq qujattardyń ishinen «Aleksandr Nevskıı» ordeniniń qosymshasy men orden kitapshasy shyqty. Qundy qujatta «Dárejesi joǵary ordenmen Qazaq KSR-inde týǵan Rahymberdi Dosmuhambetovtiń marapattalǵany» týraly jazylǵan. Sonymen qatar, jazbada jaýyngerdiń jankeshtiligi men ómir joly týraly da tyń derekter keltirilgen.
Kezinde jambyldyq jaýyngerge berilgen bul marapat Uly Jeńistiń jetpis altynshy kókteminde týǵan topyraqqa oralyp otyr. Bul kórinis erliktiń eshqashan umytylmaıtynyn taǵy bir márte dáleldep berdi. Osy bir aıtýly mereke qarsańynda Jambyl oblysynyń ákimi Berdibek Saparbaev Baýyrjan Momyshuly atyndaǵy «Jeńis» saıabaǵynda Uly Otan soǵysynyń ardageri Rahymberdi Dosmuhambetovtiń nemeresi Baýyrjan Dosmuhambetovpen kezdesip, oǵan «Aleksandr Nevskıı» ordenin tabystady. Sondaı-aq, ákim óte sırek tabystalatyn marapatqa jerlesimiz Rahymberdi Dosmuhambetovtiń de ıe bolǵany barshaǵa úlgi-ónege ekenin, kezinde joǵalǵan ordendi arada jyldar ótkende batyrdyń nemeresine tabystaý ózi úshin úlken qurmet ekenin atap ótti. Sonymen qatar, kópshilik qan maıdanda sheıit bolǵan jaýyngerlerdiń rýhyna taǵzym etip, olardy eske aldy. Al, batyrdyń nemeresi Baýyrjan Dosmuhambetov atasynyń erligi búgingi urpaqqa da úlgi bolatynyn jetkizdi. «Atamyzdyń ordenine qatysty materıaldardy izdestirip, onyń tabylýyna atsalysqan barsha azamattarǵa áýletimizdiń atynan rahmet aıtamyn. Kezinde babalarymyz qanyn tógip, Otandy qorǵaǵan. Endi bizge amanat etip qaldyrǵan el men jerdi kózdiń qarashyǵyndaı saqtaý bizdiń mindetimiz», deıdi ol.
Jambyl oblysy
