Eýropalyq komıssııanyń Vıse-prezıdenti – Eýropalyq odaqtyń Syrtqy ister jáne qaýipsizdik máseleleri jónindegi Joǵarǵy ókili Jozep Borrellmen kezdesý barysynda ol Qazaqstan men EO arasyndaǵy yntymaqtastyqty odan ári tereńdetýdiń ózekti máselelerin talqylady. Suhbattastar QR men EO arasyndaǵy Keńeıtilgen áriptestik pen yntymaqtastyq týraly kelisimniń tolyq áleýetin iske asyrý eki taraptyń múddelerine jaýap beretinin jáne pandemııadan keıingi kezeńde ekonomıkalyq ósý men damýdy qalpyna keltirýge yqpal etetinin atap ótti.
J. Borrell Qazaqstan Respýblıkasynyń Prezıdenti Qasym-Jomart Toqaevtyń «halyq únine qulaq asatyn memleket» tujyrymdamasy aıasynda qolǵa alǵan saıası jáne ekonomıkalyq reformalardyń júzege asyrylý barysymen tanysty.
Taraptar joǵary deńgeıdegi saparlar qarym-qatynastarǵa aıtarlyqtaı serpin beretinine kelisti jáne jaqyn aradaǵy baılanystardyń perspektıvalaryn talqylady. Halyqaralyq kún tártibindegi birqatar ózekti máseleler boıynsha pikir almasty. Taraptar óńirdiń turaqty damýyna baǵyttalǵan jobalar men baǵdarlamalardy iske asyrýǵa basa nazar aýdara otyryp, Eýroodaqtyń Ortalyq Azııamen yntymaǵyn talqylady.
«Biz Qazaqstanmen Eýropalyq odaqtyń Ortalyq Azııaǵa qatysty strategııasy sheńberinde, ásirese pandemııadan keıingi qalpyna keltirý, ózara baılanys jáne qaýipsizdik bóliginde yntymaqtastyqty keńeıtýimiz qajet», dep atap ótti EO Joǵarǵy ókili.
Kezdesý sońynda dıplomattar QR-EO jáne EO-Ortalyq Azııa yntymaqtastyq qurylymdary jelisi boıynsha bıyl ótetin is-sharalardyń kestesin kelisti. M. Tileýberdi óz áriptesin yńǵaıly ýaqytta Qazaqstanǵa saparmen kelip qaıtýǵa shaqyrdy.
Sondaı-aq Qazaqstan SIM basshysy Eýropalyq parlamenttiń Syrtqy ister komıtetiniń tóraǵasy Davıd Makalıster, EO Adam quqyqtary jónindegi arnaıy ókili Eımon Gılmor jáne Eýroparlament depýtaty, QR-EO parlamenttik dostyq tobynyń tóraǵasy Ryshard Charneskımen kezdesti. Kezdesýler barysynda parlamentaralyq yntymaqtastyqty nyǵaıtý, azamattyq qoǵamdy damytý, depýtattardyń parlamenttik baılanystary men ózara saparlarynyń kestesi, sondaı-aq Qazaqstandaǵy saıası reformalardy iske asyrý barysy týraly máseleler qozǵaldy.
Pikir almasý qorytyndysy boıynsha taraptar adam quqyqtaryn qorǵaý salasynda syndarly, ózara syılastyq dıalog júrgizýge kelisti.
Sonymen birge, M. Tileýberdi EO Keńesine tóraǵalyq etetin Portýgalııanyń Syrtqy jáne eýropalyq ister mınıstri Aýgýshto Santýsh Sılvamen kezdesti. Dıplomattar ekijaqty jáne kópjaqty yntymaqtastyqtyń birqatar máselesin talqylap, ózekti óńirlik jáne halyqaralyq máseleler boıynsha pikir almasty.
Saýda-ınvestısııalyq yntymaqtastyqty ilgeriletý sheńberinde Mınıstr Qazaqstanda jumys isteıtin jáne qazaqstandyq naryqta jumys isteýge múddeli iri eýropalyq kompanııalardyń basshylyǵymen birqatar kezdesý ótkizdi.
