El ishindegi eńseli tirlikti, sútteı uıyǵan uıymshyldyqty kórgende kóńiliń kóp-kórim ósip, sátimen sabaqtalǵan sáýleli isterge júregiń jylyp qalady eken. Nesin aıtasyz, el ishinde birlik bar eken, myqty eken. Adamdardyń bir-birine aq adal nıetimen qamqor bolyp, qysylyp qınalǵan sátte qos qoltyǵynan demep turýǵa umtylýynyń ózi – bir súıinish. Osy bir izgilik nuryn, shapaǵat shýaǵyn shashatyn ádemi de aıshyqty mysaldardy kórgen saıyn jan júregińdi rızashylyq sezim býyp, kókiregiń ýyljyp ketedi.
Stepnogor qalasyndaǵy kásiporyndar karantın kezinde 57 mln teńgege jýyq qarjy aýdaryp, kópbalaly jáne áleýmettik jaǵynan az qamtylǵan otbasylaryna, jalǵyzilikti, múmkindigi shekteýli adamdarǵa kómek kórsetipti. Olar emdeý oryndaryna ottegimen tynystaý apparattaryn, qorǵanys quraldaryn, azyq-túlikti satyp ápergen. Máselen, osy qaladaǵy emhanaǵa qaıyrymdy jandar 3,9 myń qorǵanys quraldaryn, 15,5 myń betperde, 1,4 myń qorǵanys kostıýmy tárizdi zattardy syıǵa tartypty. Al «EPK Stepnogorsk» AQ, «Astana nan Kemıkalz», «SGHK» seriktestikteri men «Stepnogorsk gorvodokanal» kásiporny, shaǵyn jáne orta bıznes, dinı uıymdardyń ókilderi jaman tumaý aıryqsha órship turǵan ýaqytta áleýmettik jaǵynan az qamtamasyz etilgen otbasylar men jalǵyzilikti jandardyń tizimin jasap, qajetti dári-dármekpen, azyq-túlikpen qamtamasyz etip, materıaldyq kómek kórsetken.
«Qazaqaltyn Tehnolodjı» seriktestiginiń qoldaýymen Aqsý kentinde quny 14,7 mln teńge turatyn, zamanaýı jabdyqtarmen tolyq qamtamasyz etilgen sport alańy salyndy. Bestóbe kentiniń «Raýan» mádenıet úıiniń janyndaǵy 5 mln teńgege jabdyqtalǵan, osyndaı janashyrlyqtyń arqasynda boı kótergen áp-ádemi sport alańy halyqqa qyzmet etip tur.
Qaýip qanshalyqty búıirden qysyp, tóbeden tónip tursa da, el tirshiligi toqtaǵan emes. Jurt qamyn oılaǵan jaqsy men jaısań birlikti bekemdeýge, eldiń áleýmettik-turmystyq jaǵdaıyn jaqsartýǵa bilek biriktirip, atsalysyp jatyr. Aıtalyq, qaladaǵy «Qazaqaltyn Tehnolodjı» kompanııasy shaǵyn qalany shyraılandyryp, abattandyrý týraly bastama kóterdi. Nátıjesinde, 15 shaǵyn aýdan kóp-kórim kórkeıip qaldy. Atalǵan kompanııa osy oraıdaǵy ońdy sharýany iske asyrý úshin 25 mln teńge qarajat bóldi.
Asylynda týǵan jerge degen perzenttik mahabbat kez kelgen qıyndyqty jeńedi. Bul ólkeniń adamdary da týǵan topyraqtarynyń kún ótken saıyn gúldenip, ajarlanýyna atsalysýda. Bestóbe kentiniń turǵyndary uıymdasyp, 2 mln teńgege zamanaýı balalar alańyn ornatyp berdi. Qazir Bestóbeniń balalary karantın talaptaryn saqtaı otyryp, sportpen shuǵyldanýda. Olar aǵa tolqynnyń janashyrlyǵyn jaqsy túsinedi. Kúni erteń ózderi de osyndaı sharapatty sharýaǵa bel býyp aralasyp jatsa, búgingi kúni kórgen ónegeniń órisi dep qabyldaýǵa bolar. Aýyzbirshiligi myqty jerde jekelegen adamdar da keńpeıilimen tanylýda. Aıtalyq qala turǵyny G.Ábilshenov Qanysh Sátbaev kóshesin jaryqtandyrý jumystaryn qolǵa aldy.
Qalalyq máslıhattyń depýtattary da aýyrtpalyqty ıyqtasa kóterýde úlgi bolýda. Olar kópbalaly, áleýmettik jaǵynan az qamtamasyz etilgen otbasylar men jalǵyzilikti jandardy óz qamqorlyqtaryna alyp otyr. Máslıhat depýtaty A.Qarshegenov 561 500 teńge bólse, áriptesteri O.Jaǵyparov 110 myń teńge, D.Balpanov 75 myń teńge, oblystyq máslıhattyń depýtattary B.Naýryzbaeva
80 myń teńge, J.Kamelıdenov
70 myń teńge qarajat bólgen. Bir aıta keterligi, osy bir ıgilikti isten halyq qalaýlylarynyń eshqaısysy shet qalmapty. Barlyǵy bir adamdaı hal-qadirinshe qarjy jınap, kómek kórsetken. Eń bastysy, osyndaı janashyrlyq is aldaǵy ýaqytta da jalǵasyn tabady.
«Anaǵa kómek» kópbalaly analardy qoldaýǵa arnalǵan eriktiler qozǵalysyna basshylyq jasaǵan G.Baımaqova qalanyń júzdegen turǵynyna maska men qorǵanys quraldaryn tegin taratqan. Olar osy bir qıyn sátte kópbalaly analardy qamqorlyqtaryna alyp, kúnkóristerin nazardan tys qaldyrmaıdy. Jekelegen kásiporyn basshylary da el ishindegi tynys-tirshilikti qadaǵalap otyr. Jurtty jaqsylyq iske jumyldyrýǵa Jas Otan jastar qanaty da uıytqy bolýda. Olar qarajat jınap, qajetti dári-dármekti satyp alyp, emhanada tirkeýde turǵan sozylmaly syrqaty bar adamdarǵa mekenjaılary boıynsha jetkizip berýde. Partııa ardageri N.Rýkavsova 35 myń teńge, M.Naýkev 60 myń teńge qarajatyn osyndaı izgilikti iske jumsasa, ózge de A.Belbasarova, R.Semıkın tárizdi ardagerler jomarttar qatarynan tabylǵan. Aǵa urpaqtyń bul isi ómirsheń ónegeniń órimi dep qalaı aıtpaısyz.
Jalpy, shaǵyn qalada bir-birine selbesip, kómek qolyn sozý mysaly óte kóp. Ujym basshylary da qalyptasyp otyrǵan jaǵdaıdy jete túsinip, qamqorlyqtaryn kúsheıte túsken. Qýaty mol kásiporyndarmen birge shaǵyn kásip ıeleri de ortaq iske atsalysýda. Osy oraıda Ch.Beısenbekov, G.Oralbekova, G.Búrkitbaev, S.Rýskıı, N.Andrıenko tárizdi jeke kásipkerlerdi aıta ketýge bolady. Budan ózge de jaqsylyq jasaýǵa umtylyp turatyn jany jaısań azamattar az emes.
Atymtaı jomarttyq osyndaıda tanylsa kerek. «Stepnogorsk-Energokompleks» seriktestiginiń bas dırektory A.Qarshegenov 15 kópbalaly jáne áleýmettik jaǵynan az qamtylǵan otbasyn turaqty qamqorlyǵyna alyp otyr. «Organik FOOD» seriktestiginiń dırektory G.Balpanov ta dál osyndaı kómek kórsetýde. «GMK Qazaqaltyn» aksıonerlik qoǵamy 210 kópbalaly jáne áleýmettik jaǵynan az qamtylǵan otbasyna 2 mln teńge kóleminde járdem jasaǵan. El ishindegi tirlikti, eshkimdi júdep-jadatpaımyz degen bekem birlikti kórgennen keıin «Astana-Nan Chemicals» seriktestigi 200 myń teńge qarajatyn bólip, jalǵyzilikti jandardy jebegen.
Qaladaǵy Pań Nurmaǵambet atyndaǵy meshit kómekti qajet etetin adamdarǵa 420 kılo et, 10 tonna kómir, 154 azyq-túlik sebetterin jetkizip berse, 280 myń teńge qarajatty aqshalaı úlestirgen. Qyryqqudyq aýylynyń turǵyndary aýyldaǵy jastardyń tilegin eskere otyryp, jarty mln teńge qarjy jınap, óz eldi mekenderinde jattyǵý zalyn salyp alǵan.
Bul qaladaǵy qaıyrymdylyq isterdiń bir parasy ǵana. Tipti, bárin aıshyqtaı jazý múmkin emesteı. Biz ondaǵan ult qutty qonys etken shaǵyn qalanyń janashyrlyqpen sáýlelengen shyraıynyń bir ushqynyn ǵana tilge tıek ettik. Laıym jaqsylyq shynary osyndaı leppen tamyryn tereńge jaıa bergeı!
Aqmola oblysy,
Stepnogor qalasy
