Álem birinshiliginde Latvııa, Fınlıandııa, AQSh, Germanııa, Kanada, Italııa jáne Norvegııa quramalarymen V tobynda óner kórsetetin Qazaqstan hokkeıshileri 29 sáýirden bastap elordadaǵy «Barys Arena» sport kesheninde daıyndyqtaryn pysyqtap, birer kún buryn Latvııaǵa attanyp ketti. Jahandyq doda bastalǵanǵa deıin Iýrıı Mıhaılıs shákirtteri 13 jáne 15 mamyrda Belarýs quramasymen eki márte daıyndyq oıynyn ótkizedi dep josparlanǵan.
Elimizdegi eki aptaǵa jýyq jattyǵýdan keıin oıynshylardyń áleýetin baıqaǵan bas bapker álem chempıonatynda óner kórsetetin 28 hokkeıshiniń esimin atady. Rıgadaǵy básekelerde negizgi qaqpashy Henrık Karlsson ekeni sózsiz. Degenmen, Iý.Mıhaılıs qosalqy qaqpashylar – Andreı Shýtov pen Nıkıta Boıarkınge de ózderin kórsetýge múmkindik beretinin aıtty.
Qorǵanys Darren Dıs, Alekseı Maklıýkov, Ivan Stepanenko, Djessı Bleker, Vıktor Svedberg, Egor Shalapov, Samat Danııar, Valerıı Orehov jáne Kırıll Polohovqa senip tapsyrylyp otyr. Al shabýylda Roman Starchenko, Evgenıı Rymarev, Anton Sagadeev, Pavel Akolzın, Aleksandr Shın, Saıan Danııar, Álıhan Ásetov, Dmıtrıı Shevchenko, Nıkıta Mıhaılıs, Kırıll Panıýkov, Dmıtrıı Gýrkov, Kertıs Volk, Kırıll Savıskıı, Arkadıı Shestakov, Artem Lıhotnıkov jáne Egor Petýhov sekildi «Barys» pen О́skemenniń «Torpedosyn» órge súıregen tájirıbeli hokkeıshiler óner kórsetedi.
Latvııaǵa baratyn negizgi quramdy jarııalaǵannan keıin ulttyq quramanyń bas bapkeri Iýrıı Mıhaılıs óz pikirin bildirdi. «Ulttyq quramaǵa shaqyrtý alǵandardyń barlyǵy da halyqaralyq arenada Qazaqstannyń namysyn qorǵaýǵa laıyqty jigitter. Jıynǵa shaqyrylǵan hokkeıshilerdiń bárin baqylap, úmitkerlerdi sońǵy kúnde bir-aq anyqtadyq. Tańdaý ońaı bolǵan joq. Al álem chempıonatyna baratyn 28 hokkeıshiniń tizimine enbeı qalǵan hokkeıshilerge bolashaqta úmit artatyn bolamyz. Olar – Dmıtrıı Grens, Dmıtrıı Stepanov, Ádil Beketaev, Aleksandr Pısarev, Madııar Ibraıbekov, Mıhaıl Rahmanov, Maksım Mýsorov, Leonıd Metalnıkov, Demıd Eremeev. Al Leonıd Metalnıkov jaraqatynan jazylyp, Rıgada bizge kómektese alady dep sońyna deıin kúttik. Biraq ekijaqty matchtan keıin ol ózi kelip, oınaýǵa áli 100 paıyz daıyn emes ekenin aıtty. Ol jaraqatynan áli tolyq aıyqqan joq. Meniń oıymsha, bul naǵyz er jigitke saı áreket boldy. Biz basqa qorǵaýshyǵa múmkindik berdik», dedi Iý.Mıhaılıs.
Álem chempıonatynyń jarys kestesine sáıkes, Qazaqstan quramasy óziniń tusaýkeser kezdesýin 22 mamyrda aıdyn ıelerimen ótkizedi. Kelesi kúni Fınlıandııamen kúsh synasady. Al odan keıingi kúnderi mynadaı komandalarmen sheberlik baıqasady: 25 mamyr – AQSh, 26 mamyr – Germanııa, 28 mamyr – Kanada, 29 mamyr – Italııa jáne 31 mamyr Norvegııa hokkeıshilerimen kezdesedi. Eger jerlesterimiz segiz quramanyń ishinde alǵashqy tórt orynnyń birin ıelense, pleı-off kezeńine joldama alady.
Tarıhqa kóz júgirter bolsaq, Qazaqstan quramasy buǵan deıingi álem chempıonattaryna segiz ret qatysqan eken. О́kinishke qaraı, jerlesterimiz sol jarystardyń birde-bireýinde maqtanarlyqtaı nátıjege qol jetkize almady. Tórtkúl dúnıeniń myqtylary bas qosqan jarysta jerlesterimiz mynadaı oryndardy ıelendi: 1998 jyl – 15-oryn, 2004 jyl – 13-oryn, 2005 jyl – 12-oryn, 2006 – 15-oryn, 2010 jyl – 16-oryn, 2012 jyl – 16-oryn, 2014 jyl – 16-oryn jáne 2016 jyl – 16-oryn.
Taǵy bir aıta keter jaıt, álem chempıonatynyń erejesi boıynsha, toptyq kezeńde eń sońǵy oryn alǵan komanda tómengi dıvızıonǵa syrǵıtyn. Alaıda bıyl I dıvızıonda álem chempıonaty ótkizilmegendikten, elıtaly toptaǵy komandalar óz oryndaryn saqtap qalady.
